Nunatsinni pisinnaatitaaffinnik tunngavilittut atuarfeqalerpoq

Meeqqat qanoq pisinnaatitaaffeqarpat? Ilinniagaqarnissamut pisinnaatitaaffeqarput, toqqissisimasumik alliartornissamut pisinnaatitaaffeqarput aamma pisinnaatitaaffimminnik ilisimasaqarnissamut pisinnaatitaaffeqarput. Sisimiuni atuarfiit marluk pisinnaatitaaffinnut tunngatillugit meeqqanik ilinniartitsinissamut Kalaallit Nunaanni siullersaallutik aallartittussanngorput.

UNICEF-ip nunani tamalaani atuarfinnut tunngavigisaa ”Atuarfik Pisinnaatitaaffinnik Tunngavilik” nunatsinni atorneqalerpoq. Ulloq 14. juni 2021 Sisimiuni atuarfiit Minngortuunnguup Atuarfia aamma Nalunnguarfiup Atuarfia Kalaallit Nunaanni pisinnaatitaaffinnik tunngavilittut atuarfiit siullersaattut akuerineqarsimapput.

Qeqqata Kommunia UNICEF-ilu suleqatigiillutik tamatumannga angusaqarsimapput, kommunimilu borgmesterip upperaa, atuarfiit meeqqat siunissaannik allanngueqataasinnaasut.

- Qeqqata Kommuniani ukiuni kingullerni meeqqat inuusuttuaqqallu atugarisaat
qulaajaavigalugillu immikkut suliniuteqarfigaavut. Meeqqat pisinnaatitaaffimminnik
ilisimaarinnittut, aamma inersimasunngorunik pisinnaatitaaffinnik pingaartitsillutik
inooqataanermikkut akisussaassusilimmik inuiaqatigiinni kivitseqataalerumaartut upperaara, Malik Berthelsen(S) UNICEF-ip kommunillu tusagassiorfinnut nalunaaruteqarneranni oqarpoq.

Atuarfinni meeqqat atugarissaarnerulertartut

FN-ip meeqqat pisinnaatitaaffii pillugit isumaqatigiissutaanni tunngaviusut atuartut ulluinnarni toqqammavigissagaat pisinnaatitaaffiit pillugit atuarfiit siunertarivaat. Siornali atuartut pisinnaatitaaffii pillugit atuarfiit paasititsiniaallutik suliaqangaatsiarput atuarfimmilu
atugarissaarnerulernissaat anguniarlugu atuartut peqataatissimallugit.

- Pisinnaatitaaffiit pillugit atuarfimmi atugarissaarnissaq ataatsimoorluni aaqqissugaasumillu
iliuuseqarnikkut anguniarneqartarpoq. Meeqqat pisinnaatitaaffii pillugit isumaqatigiissummik ulluinnarni suliaqarnerminni atuartut klasseminni nivingatitaminnik klasseni immikkut tamarmik charteriliorput.

- Klassemi charteri tassaavoq pisinnaatitaaffiit aalajangersimasut tunngavigalugit
klassep malittarisassamisut suliai, Minngortunnguup Atuarfiani pisortaq Jesper Ryttov oqaluttuarpoq.

Meeqqat iluameersumik oqaluttalersimasut

Aamma klassimi charterip saniatigut pisuttuaqatigiittarneq atuutsinneqalerpoq. Pisuttuaqatigiittarnermi meeqqat atuarfinni atugarissaarnerulernissaat anguniagaavoq. Pisuttuaqatigiinnerni atuartut atuarfiup iluani pisuttarput sumilu toqqissisimanannginnersoq allattortarlugit.

Taamaalioreernermi suliniutissat suut aallartinneqassanersut pillugit atuartut iliuusissatut pilersaarutinut peqataatinneqartarput.

- Atuartut tamarmik pisuttuaqatigiinnerit pingaarutilittut isigaat, taama oqaluttuarpoq
Nalunnguarfiup Atuarfiani trin to-mi ilinniartitsisoq, nangillunilu

- Trin to-mi atuartut imminnut iluamik oqaluuttarnissaat sulissutiginikuuarput. Tassani
tunngavigaavut Meeqqat pisinnaatitaaffii pillugit isumaqatigiissummi immikkoortut pingasut, kingumullu qiviassaguma malugisinnaavara atuartut imminnut iluameernerusumik
oqaluuttalersimasut, ilinniartitsisoq oqarpoq.

Ullumikkut atuarfiit 4000-t sinnillit UNICEF-ip Pisinnaatitaaffinnik Tunngavilittut atuarfiusut ingerlapput. Tuluit misissuinerisa takutippaat, meeqqat pisinnaatitaaffitik
nalunngikkaangamikkit atugarissaarnerulersartut, qinngasaarinnginnerulersartut
tunniusimanerulersartullu.

Powered by Labrador CMS