Nunatsinni Nato-mit sakkutooqalernissaa IA-mit isumaqatigineqanngilaq

Illersornissaq pingaaruteqartoq partiinit oqariartuutigineqartoq qinersinissap takutippaa.

Ukrainemi sorsuttoqarnera ilutigalugu Nato-mit sakkutuunik aggersaasoqassanngitsoq Aaja Chemnitzimit neriuutigineqarpoq.

- Partiit arlaliusut NATO-p nunatsinniittariaqanerannik oqaaseqarsimapput. Tamanna Inuit Ataqatigiinniit isumaqatiginngilarput. Ukrainemi sorsuttoqartillugu nunarsuatsinnilu isummatigut akerleriittut amerliartortillugit NATO-p nunatsinniilernissaanik isumaqarneq ulorianartuuvoq. Sapinngisarput tamakkerlugu nunatta eqqissisimaffiunissaa siunertaassaaq.

Imaatigut eqqissisimanissaq

- Akerlianik NATO-p sakkutuuinik nunatsinniinnissaanillu noqqaagutta pisoq annertuseriartissinnaavarput. Kalaallit Nunaat Atlantikorlu avannarleq immikkoortittariaqarpagut. NATO-mut naaggaarnitsinnut taarsiullugu imaatigut, nunakkut silaannakkullu illersornissatsigut eqqissisimasumik ineriartortitsinissarput angissavarput, aammali cyber kiisalu silaannarsumi(space) sillimaniarneq eqqaamallugit folketingimi ilaassotap oaatigaa.

Demokraatit sinnerlugit folketingimut qinigassanngortittup Justus Hansenimip oqariartuutaa akerlilerpaa. Nutaamik eqqarsartoqartariaqartoq Justus Hansen isumaqarpoq:

- Isumaqarpunga, ukkatarinerusariaqaripput, danskit sakkutooqarfiinut ilanngussinnaaneq, imarsiortunut aamma sakkutuunut timmisartortartunut. Nunatut timmisartoqarfinnut nutaanut nunaminertanik atuisitsinissanut tapersiisinnaavugut. Tassani eqqarsaatigaara NATO-p sakkutuunut timmisartoqarfii aammalu Kangerlussuup piorsarneqarsinnaanera, Justus Hansen naliliilluni oqarpoq.

Taama aalajangernissaq sakkusiornermik isigineqassanngitsoq, Kalaallit Nunaatali toqqissisimasuunissaanik qulakkeeriniarnertut isigineqassalluni, taamatullu Naalagaaffeqatigiinnermi aammalu nunarsuarmi nunani killerni Kalaallit Nunaata inissisimaffia inissisimassasoq isumaqarluni.

Naliliineq: Sakkutooqarnerulersinnaavoq

Tamanna Aaja Chemnitzimit isumaqatigineqanngilaq.Silaannakkut angallannerit annertunerusumik paasisimasaqarfiginissaat, cyberikkullu isumannaatsuunissatigut nukittorsaanissaq eqqarsaatigalugu tigussaanerusunik Kalaallit Nunaat piumasaqarnerussasoq isumaqarpoq.

Kunngeqarfimmi nunanut allanut illersornissamullu nalilersuineq 2031-mut saqqummiunneqarpoq, nalilersuinerullu takutippaa. Nunani avannarlerni Issittumilu NATO-p sakkutiinik amerlisaanissaa naatsorsuutigineqarpoq. Oqartussaqarfik Kalaallit Nunaanni inissisimasariaqanngitsoq aamma nalilerneqarpoq.

- Akerlianik ilimagineqarpoq, iligiit sakkutuui amerlanerusut siunissami Issittumiillutillu Atlantikup Avannaaniittassasut - amerlasuutigut Kunngeqarfiup oqartussaaffiata qanittuani iluaniluunniit. Tamatuma aamma malitsigisaanik nutaanik suliassaqartoqalissaaq, naliliinermi oqaatigineqarpoq.