Nunatsinni Nakorsat peqatigiiffianni siulittaasoq: Tutsuiginanngitumik nuannareqqusaartumillu qineqqusaarneruvoq ajornerpaaq
Kalaallit Nunaanni Nakorsat peqatigiiffianni siulittaasoq Hans Christian Florian Naleqqamit inummut ataatsimut tunngatillugu suliap isumageqquneqarneranut narrujuummersimavoq, tassani politikkerit, Jens Napaattoorlu ukiorpassuarni peqqinnissaqarfimmut amikkisaartitsisimanerat eqqarsaatigalugu taamatut oqarpoq.
- Tutsuiginanngitumik nuannareqqusaartumillu politikkiuvoq ajornerpaaq.
Taamatut toqqaannartigisumik oqarpoq Tasiilami nakorsaq Kalaallillu Nunaanni Nakoersat peqatigiiffianni siulittaasoq Hans Christian Florian.
Jens Napaattuup kræfteqartup Naja Zeeb Pedersenip misiliummik katsorsarneqarnissaanut aningaasaliissuteqarnissamik partiinut kaammattuinera pillugu Sermitsiaq.AG-p tallimanngornermi ilanngutassiaqarnerata kingorna taamatut oqaaseqarpoq. Iluaqutaasartutut uppernarsarneqarsimanngitsumik katsorsaanissaq Peqqinnissaqarfimmi Tulleriiaarisarnermut ataatsimiititaliamit itigartinneqarsivoq.
Qineqqusaarutaannaasoq
Hans Christian Florianip erseqqissaassutigaa, Naja Zeeb Pedersenimut misiginneqataalluinnarnini, isumaqarnerarporli Jens Napaatuup avaanngunarluinnartumik piumasaminik naammassinneqqusisimasoq.
Kalaallit Nunaanni Nakorsat peqatigiiffianni siulittaasup oqaatigaa, Peqqinnissaqarfimmut aningaasaliissutaasartut annikittuaraatillugit, tamanna qinneqqusaarutaannaasoq naleqqutinngittorlu:
- Politikkerit, Jens Napaattoorlu ukiorpassuarni peqqinnissaqarfimmut amikkisaartitsisimapput. Arnap pineqartup (Naja Zeeb Pedersen) ajornartorsiumminik maalaaruteqarnera pissusissamisoorpoq, tamannali akissaqartinngilarput, akissaqartitsisoqannginnissaanimmi aalajangiisoqarsimavoq, taanna oqarpoq:
- Peqqinnissaqarfimmi aqutsisunit oqaatigineqarpoq, arnap ilungersortup katsorsartikkusunnera pillugu inuit uteriittumik soqqusaatsumillu oqaaseqartarnerat naapertuutinngilluinnarpoq. Missingersuutit malinneqarnissaannik piumasaqartarput. Pissusiviusorli tassaavoq, tulleriiaarisarnermut ataatsimiititalimut sinaakkusiunneqarsimasut killeqarluinnarnerat.
Akisussaaffimmik qimarratiginninnerusoq
Hans Christian Floriani annertunerusumik oqqasserusunngilaq, narrujuummissutigisimavaali peqqinnissaqarfimmut amikkisaartitsisoqarsimanera eqqarsaatigalugu Jens Napaattuup inummut atatillugu suliaq, kikkunnit tamanit nalligineqartoq pillugu saqqummiussinera. Taassuma oqaatigaa, peqqinnissaqarfiup akisussaaffigineqalersimanera ajunngitsuusoq, "namminerli angerlarsimaffimmi oqartussaarusukkaanni" peqqinnissaqarfik isumagineqartariaqartoq.
- Nammineerluta qanoq iliuuseqarnissatsinnik nalorninerput pissutigalugu peqqinnissaqarfiup akisussaaffigineqarnera Danmarkimut utertinnera iluaqutaanavianngilaq. Tamannami akisussaaffimmik qimarratiginninneruvoq - piffissaagallartillugumi peqqinnissaqarfik salliutinneqartussaagaluarpoq.
Jens Napaattuup SermitsiaqAG-mut ilisimatitsusssutigaa, Hans Christian Florianip qineqqusaarutaannaasutut oqaaseqarnera ajuusaarutigalugu, tamannali itinerusumik tigunagu oqaatigaa.
Narrujuummisimanera paasisinnaaviuk?
- Peqqinnissaqarfimmut amikkisaartitsisimanerput pillugu oqaaseqarnera 110 procentimik isumaqatigaara. Naleqqamit arlaleriarluta oqaatigisarsimavarput, peqqinnissaqarfimmut aningaasaliissutaasartut annikittuaraasamarta peqqinnissaqarfik napparsimasoq katsorsarneqartariaqartorlu. Tamannami qangalili nassuerutiginikuuarput.
Jens Naapaattooq isumaqarpoq, Naja Zeeb Pedersenimut atatillugu immikkut ittumik aningaasaliissuteqartoqartariaqartoq, misiliummik katsorsaasarnissaq aningaasanut inatsimmut ilaatinneqarsimammat - ajornartorsiullu pineqartoq siunissami aaqqiissutissarsiorneqassasoq.
- Peqqinnissaqarfimmut atatillugu siunnersuutinik arlalinnik saqqummiussiniartarsimavugut. Oqaasii isumaqatigilluinnarpakka, maannakkulli iliuuseqartariaqarpugut. Manna pisoq aatsaat nalaanneqalinngilaq, Naja Zeeb Pedersenimulli atatillugu kinguartitseqqissinnaanngilagut.