Nunatsinni Nakorsaaneq: Tunillatsittoqarsimanerata takutippaa corona tuniluuteriaannaasoq

Naalakkersuisut Siulittaasuata erseqqissaatigaa Kalaallit Nunaannik matusinissaq pilersaarutaanngitsoq, pingaaruteqarnerarpaali kikkut tamarmik inassuteqaatinik malittarisassanillu malinninnissaat.

Coronavirusimik tunillatsissimasoq nutaaq Nuummi paasineqarpoq. Ullut tallimat qaangiunnerani misissorteqqinnermi tamanna paasineqartoq, Namminersorlutik Oqartussanit ilisimatitsissutigineqarpoq.

Pingasunngornermi tusagassiortunik katersortitsinermi Nunatsinni Nakorsaanerup Henrik L. Hansenip oqaluttuaraaa tunillatsittoqarsinnaanera naatsorsuutigineqareersoq, aamma tunillatsittoqarsimanerata takutikkaa nunanit coronavirusimik tuniluuffiusunit Kalaallit Nunaat ulorianartorsiortinneqartoq.

Nunatsinnili Nakorsaanerup oqaatigaa, nutaamik tunillatsittoqarsimanerata malitsigisaanik Nuummi tuniluuttoqalersinnaaneranik isumaqarnissaq tunngavissaqanngitsoq, tunillatsissimasummi malittarisassat inassuteqaatillu malissimammagit.

Naalakkersuisut Siulittaasuata Kim Kielsenip Nunatsinnilu Nakorsaanerup Henrik L. Hansenip sakkortuumik kaammattuutigaat, angalasimanermut atatillugu imaluunniit ippigisaqaraanni mattusimasarnissamut aamma misissorteqqitarnissamut malittarisassanik kikkut tamarmik malinninnissaat:

- Ippigisaqalernermi pingaaruteqarpoq malittarisassanik malinninnissaq. Pasitsaassaqaraanni peqqinnissaqarfimmut attaveqartoqassaaq, Kim Kielsen tusagassiortunik katersortitsinermi oqarpoq.

Matusisoqaqqissanngitsoq

Kim Kielsenip erseqqissaatigaa, nutaamik tunillatsittoqarsimanerata malitsigisaanik nuna matuneqaqqissanngitsoq:

- Kalaallit Nunaannik matusinissamik pilersaaruteqanngilagut. Malittarisassat iluaqutaapput malinneqassallutillu, Kim Kielsen ukiup affaata matuma siorna kingullermik Nuummi tunillatsittoqarsimaneranik naammagisimaarinnittoq oqarpoq.

Nunatsinni Nakorsaaneq naapertorlugu, tunillatsissimasoq ajunngilaq annikitsuinarnillu ippigisaqarpoq.

- Pisumi matumani malittarisassat tamarmik malinneqarsimanerat nuannerpoq, Henrik L. Hansen oqarpoq.

Angalaqataasmasoq aamma mattusimatinneqartoq

Tunillatsittoqarsimasoq paasineqarmat, timmisartumi ilaasimasut allat attavigineqarsimanngillat, Nunatsinni Nakorsaaneq oqarpoq, nangillunilu:

- Immikkut malitseqartitsinissamut tunngavissaqarsorinngilarput. Tunillatsissimasoq ippassaq misissorteqqippoq, tallimanngormallu maanga tikissimalluni. Timmisartumulli ilaasimasut tamarmik mattussimasussaapput, malittarisassanillu malinnittussaallutik.

- Ullut 14-it qaangiutsinnagit mattusimajunnaarusukkunik misissorteqqittussaapput. Tunillatsissimasumik angalaqateqarsimanerat ulorianarnerpaajunngilaq. Ulorianarnerpaarli tassaavoq, Danmarkimit tuniluuffiusupilussuarmit ilaasut tamarmik aggersuunerat, Henrik L. Hansen oqarpoq.

Misissugassatut tiguneqarsimasut ullunik tallimanik pisoqaassuseqassasut

Taassuma erseqqissaatigaa, Kalaallit Nunaannukarniarluni timmisartumut ikitinnani coronamut misissortissimanerit sivisunerpaamik ullunik tallimanik pisoqaassuseqassasut.

Taamatut piffissaliisoqartariaqarsimavoq, innuttaasut aallartinnatik misissorteqqinnissaat ajornakusoorsinnaammat.

- Aamma tunillatsissimannginnermut uppernarsaateqanngikkaanni timmisartumut ilaasoqaqqusaanngilaq, Henrik L. Hansen oqarpoq.

Powered by Labrador CMS