Nunatsinni Nakorsaaneq: Suli tuniluuttoqangaatsiarsinnaavoq
Kukkusoqarsimanera pissutigalugu misissugassatut tigusat kingulliit akissutaannik Nunatsinni Nakorsaaneqarfik tigusaqarsimanngilaq. Tassa nunami inuit qulit suli kisimik tunillatsissimasuupput, taakkunannga pingasut peqqisseqqissimallutik.
- Ajoraluartumik Danmarkimi kukkusoqarsimavoq, taamatullu pisoqaqqinnginnissaa anguniarlugu tamaviaarluta sulissuteqarpugut, Nunatsinni Nakorsaaneq assartuinermi kukkusoqarsimanera pillugu oqarpoq.
- Imaakkami, sisamanngormat tallimanngormallu misissugassanik amerlavallaanngitsunik tigusisoqarsimavoq, taamaammallu napparsimasut tunillatsissimasinnaanerminnit malunniuteqartut tamaasa kaammattorusuppakka peqqinnissaqarfimmut saaffiginneqqullugit, Henrik L. Hansen oqarpoq.
- Tamanna pingaaruteqarluinnarpoq pisumut malinnaanissatsinnut. Nutaanik tunillatsittoqarpat, tuniluuttoqalinnginnissaa anguniarlugu ingerlaannaq taakku nassaariniarneqassapput mattusimatinneqarlutillu.
- Illit nammineq napparsimaguit nalunngisavilluunniit arlaat napparsimappat, tapersersueqataallutit peqqinnissaqarfimmut saaffiginnigit.
Tuniluuttoqangaatsiarsinnaasoq
- Kalaallit Nunaanni tuniluuttoqangaatsiarsinnaanera suli aarlerinaateqarpoq. Tunillatsissimasulli tamaasa nassaarisinnaagutsigit, tuniluuttoqalersinnaanera pinngitsoortissinnaavarput.
- Maanna sapaatip akunnera naalerpoq ullullu nalliuttut takkutingajalelutik. Peqqinnissaqarfilli uninnganani suliaqartuarpoq. Sapaatip akunnerata naanerani matumani misissugassamik tigusiffigitinnissamut periarfissaqarpoq, soorunami aamma ulluni nalliuttuni tulliuttuni, Henrik L. Hansen tamatuma Nuummi sineriammilu sumiiffinni allani atuunneranik erseqqissaasoq oqarpoq.
- Siusinnerusukkut malittarisassanngortinneqartut malinneqarnissaat aamma pingaaruteqarpoq. Kalaallimmi Nunaanni suli tuniluuttoqangaatsiarsinnaavoq.
Nunatsinni Nakorsaanerup Henrik L. Hansenip qulakkeerlugu suli oqaatigisinnaanngilaa, tuniluunnerup siaruaassinnaanera qaangiunnersoq, taamaammallu nunami angallannermik ammaaqqinnissaq suli qunugalugu.
- Peqqinnissaqarfimmi sulisutigut maannakkorpiaq unammilligassaqanngilagut, Nunatsinni Nakorsaaneq ilisimatitsivoq.
Nunatsinni Nakorsaanerup nunami nunamiillu timmisartukkut angallannerup ammaqqinneqarnissaanut tunngassuteqartut, Kim Kielsenimut ataasinngorpat pilersaarutit pillugit paasissutissiiniartumut innersuuppai.
Imigassap inerteqqutaalernera pissutigalugu angerlarsimaffinni eqqissiviilliortoqarsimava?
- Apeqqut taanna politiit akisassaraat, Aningaasaqarnermut Naalakkersuisoq Vittus Qujaukitsoq, tusagassiortunik katersortitsinermi Naalakkersuisut sinnerlugit saqqumiisoq oqarpoq.
Angalasut
Vittus Qujaukitsup aamma akissuteqarfigisinnaanngilaa, inuit qassit timmisartumut Dashimut ilaallutik Københavnimut uterlugulu timmisartuunneqartarnersut.
Nunatsini Nakorsaanerup oqaatigaa, inuit qassit nunatsinnut timmisartuunneqarsimanersut ilisimanagu.
- Inuiaqatigiinni suliassanik isumaginnikkiartortut tamarmik inissaqartinneqarput. Isumaqarpunga inuit angalanissamut malittarisassanik naammassinnittut aamma ilaatinneqartartut, Nunasinni Nakorsaaneq oqarpoq.