Nunatsinni Nakorsaaneq: Qanermut assiaqutit atoqquneqalersinnaapput
Nunatsinni Nakorsaanerup Henrik L. Hansenip piffissap ilanni qanermut assiaqutinik pisortat atueqqusilersinnaanerat itigartikkusunngilaa. Ullumikkulli Kalaallit Nunaanni qanermut assiaqutinik atuinissamut tunngavisssaqanngilaq, nunatsinni nakorsaaneq erseqqissaavoq.
Europami nunat innuttaasut katersuuffigisartagaanni - pingaartumik pisiniarfinni imminnut qanillivallaannginnissamik piumasaqaatinik malinniffigiuminaatsuni qanermut assiaquteqarnissamik inassuteqanngikkunik piumasaqaatillit amerliartorneranni – nunatsinni nakorsaanerup maannakkorpiaq tunngavissaqannginnerarpaa, Kalaallit Nunaanni qanermut assiaqutit atoneqarnissaannik inassuteqarnissamut.
- Tamanna imaaliallaannangassaanngilaq. Qanermut assiaqutit nalinginnaasut iluaqutaasinnaaneri qulakkeerneqarsimanngilaq. Allat namminerlu tunillanneqarsinnaaanerat annikillisissinnaavaat. Immitsinnut qanillinaveersaartuartilluta qanermut assiaqutinik atuinissamik inassuteqarnissaq maannakkorpiaq tunngavissaqarsorinngilara, Henrik L. Hansen erseqqissaavoq.
Pissutsit allanngorsinnaasut
Nunatsinni Nakorsaanerup oqaatigaa, at ”pisortat suliniutaat tamarmik piffissami sivisuumi atuuttussaasut”.
- Taamaammat maannakkut pisariaqartitsisoqannginnerani tamanna atuutsilernianngilarput. Pisariaqartitsisoqalerpat sunniutaasussaq ajoquserneqarsinnaammat, nakorsaaneq nassuiaavoq.
- Tuniluuttoqalissagaluarpat pissutsit allanngupallassinnaapput. Tuniluuttoqarneralu siaruatsaaliorniarlugu tamanna sakkut ilagisinnaavaat. Imaassinnaavoq tuniluuffiusumi qanermut assiaquteqarnissaq piumasaqaataalersinnaasoq, Nunatsinni Nakorsaaneq oqarpoq.
- Peqqinnissqarfik kommunillu illersuutissarpassuarnik katersisimapput. Qanermulli assiaqutit pineqartillugit politikkerit aalajangertussaavaat, innuttaasut pisariaqalersillugut qanermut assiaqutissanik namminneerlutik pisiaqartassanersut, Henrik L. Hansen erseqqissaavoq.
Qanermut assiaqutinut piumasaqaatit
Qanermut assiaqut annoraaminermik sanaaq Danmarkimi Peqqissutsimut Aqutsisoqarfiup siusinnerusukkut atoqqusarsimanngilaa, maannali oqaatigineqartarpoq, qanermut assiaqut annoraaminiusoq soqannginnermiit pitsaanerusoq. Qanermulli assiaqutit ataasiaannarluni atugassiaasut CE-mik ilisarnaatitallit assigalugit illersuisinnaarpianngilaq. Taamaammat qanermut assiaqutit annoraaminiusut atorneqarnissaannut arlalinnik malittarisassaqarpoq.
Qanermut assiaqut annoraaminiusoq:
Assersuutigalugu annoraassiassaassat pingasut qaleriissillugit suliassaaq.
Qingaq qanerlu matulluartassavai.
Elastikkitaqassaaq.
60 gradimut errorneqartassaaq.
Ullut tamaasa errorneqartassaaq, imaluunnit isugutappat akulikitsumik errorneqartassaaq.
Atorneqareerpat ingerlaannaq errugassanngortinneqassaaq.
Allanut atortinneqartassanngilaq.
Qanermut assiaqut qanorluunniit ittuugaluarpat, pitsaanerpaamik illersorneqarnissaq anguniarlugu eqqortumik atorneqartassaaq.
Qanermut assiaquserninni assatit eqqiluittuutikkit.
Qanermut assiatip atornerani attornaveersaaruk.
Qanermut assiaqut peerukku assatit errukkit.
Pissarsiffik: Peqqissutsimut Aqutsisoqarfik, Danmark