Skip to main content

Nunatsinni Nakorsaaneq: Nuummi katerittunut akuunaveersaartoqarli

Nuummi tunillatsissimasut akiuussutissalertissimasuullutillu akiuussutissalertissimasuunngillat. Nunatsini Nakorsaanerup erseqqissaassutigaa, akiuussutissalertissimasut tunillanneqaraangamik annikinneerarsuarmik malugisaqartartut, kaammattuutigaali inuppassuit katerinnerannut akuunaaveersaartoqassasoq.

Pingasunngormat tunillatsissimasunit 24-usunit aqqanillit akiuussutissalerneqarsimanngillat - taakkunannga meeqqat marluupput.

Inuit pingasut ilaannakortumik akiuussutissalerneqarsimapput, qulillu tamakkiisumik akiuussutissalerneqarsimallutik. Coronamut atatillugu sulisoqatigiit Sermitsiaq.AG-mut taamatut ilisimatitsipput.

Tunillatsissimasunit 18-it Nuummi unnuakkut imerniartarfimmiinnerminni tunillatsissimapput, tassanilu tunillaatiararsuusoq Deltavarianti tuniluulluni.

- Nuummi tuniluuttoqalersoq qularutissaanngilaq. Akiuussutissalerneqareersimanngikkaannilu imminnut illersornissamut siunnersuut pitsaanerpaaq tassaavoq akiuussutissalerneqarnissaq, Nunatsinni Nakorsaaneq Henrik L. Hansen Sermitsiaq.AG-mut oqarpoq.

Akiuussutissalerneqarnissaq siunnersuutit pitsaanerpaartarigaat

Nunatsinni nakorsaanerup erseqqissaassutigaa, nunani tamalaani misilittakkat takutissimagaat, akiuussutissalerneqarsimanngitsut tunillatsinnissamut ulorianartorsiornerusartut, aamma akiuussutissalerneqarsimanngitsut napparsimarujussualersinnaanermut ulorianartorsiornerusartut.

Akiuussutissalertissimagaluarlutik tunillatsissimallutik ippigisaqalaartut allanik tunillaasinnaapput, akiuussutissalerneqarsimanngitsunulli sanilliullutik tunillaasinnaanera annikinneerarsuuvoq. Tunillatsissimallutik ippigisaqanngitsut allanik tunillaasinnaanersut erseqqissumik paasineqarsimanngilaq, nunatsinni nakorsaaneq ilisimatitsivoq.

- Akiuussutissalertinnikkut inuiaqatigiinni tuniluunnerup sapinngisamik siaruatsaaliorneqarnissaa anguneqarsinnaavoq. Taamaammat illit nammineq allallu eqqarsaatigalugit akiuussutissalerneqarnissaq siunnersuutit pitsaanersaraat, nunatsinni nakorsaaneq oqarpoq.

Illoqarfimmi tuniluuttoqartoq

Piffissami kingullermi Nuummi atuarfinni meeqqerivinnilu meeqqat akornanni tuniluuttoqangaatsiarpoq. Pingasunngormalli tunillatsissimasut amerlanersaat unnuakkut illoqarfimmiinnerminni tunillatsissimapput.

- Maannakkut taamatut inissisimanitsinni katerittunut akuunaveersaartoqartariaqarpoq. Sapaatip akunnerani matumani tunillatsissimasut amerlanersaat unnuakkut illoqarfimmiinnerminni tunillatsissimapput, tassa tunillanneqarusunngikkaanni inuppassuit katerinnerannut akuunaveersaartoqartariaqarpoq, Henrik L. Hansen oqarpoq.

Nunatsinni nakorsaanerup naggasiiluni innersuussutit suli atuuttut malinneqarnissaat innersuussutigaa: Allanut qanillinaveersaarit, assatit errortakkit assannullu spritsi atortaruk.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER