Nunatsinni Nakorsaaneq: Mattusimasussaaneq pillugu malittarisassat malinneqarsimanngillat
Nunatsinni nakorsaanerup Naalakkersuisullu siulittaasuata marlunngormat erseqqissaatigaat, tunilatsissimalluni Kalaallit Nunaannut tikinnermut atatillugu mattusimasussaaneq pillugu malittarisassat malinneqarnissaat pingaaruteqartoq.
Munck Gruppenimi sulisup sapaatip akunnerani kingullermi coronavirusimik tunillatsissimaneranut atatillugu mattusimasussaanermut malittarisassat malinneqarsimanngillat, Nunatsinni Nakorsaaneq Henrik L. Hansen oqaluttuarpoq.
- Tusagassiivitsigut tamanit ilisimaneqarsimavoq, Ilulissani ataatsimeeqatigiissimanerit ilaat apeqquserneqarsimasut. Pisut ilaanni malittarisassat malinneqarsimanngillat, Henrik L. Hansen oqarpoq.
Pisorli ajunngitsumik nakkutigineqartoq nalilerneqarpoq:
- Oqaatigineqareersutut inuit marluk nutaat tunillatsissimapput. Inuilli taakku eqqaanniissimasut amerlasuut misissortinnissaat qulakkeersimavarput. Allanillu tunillatsittoqarsimasinnaaneranut tunngavissaqarsorinngilarput.
Pisoq qanimut malinnaavigineqartoq
- Taamatulli oqarnissaq siusippallaalaarpoq. Taamaammat Aasianni Ilulissanilu pisut qanimut malinnaaffigaavut, nunatsinni nakorsaaneq marlunngormat tusagassiortunik katersortitsinermit oqarpoq.
Nunatsinni nakorsaanerup oqaatigaa, tunillatsissimasut taakku marluk ajunngitsut napparsimarulunngitsullu.
Ilulissani Munck Gruppenimi sulioq tunillatsissimasoq paasineqarmat, sulisut arlallit Avannaatalu Kommuniani borgmesteri Palle Jerimiassen Munck Gruppenimi sulisunik ataatsimeeqateqateernermi angerlartinneqarput:
- Avataanit tikittut tunillatsissimannginnerminnik misissorneqarsimatinnatik pisortanik inunnilluunniit allanik ataatsimeeqateqartassanngillat, nunatsinni nakorsaaneq oqarpoq.
Kielsen: Inuunermik annaassisinnaavugut
- Malittarisassat malinneqarnissaat pingaaruteqarpoq. Malikkutsigit inuunermik annaassisinnaavugut, Naalakkersuisut Siulittaasuat Kim Kielsen oqarpoq.
Kalaallit Nunaannut tikinnermi misissortittoqartassaaq, aamma ingerlaannartumik angerlarsimaffimmi imminut mattuttoqartassaaq. Ullut tallimat qaangiunneranni misissorteqqittoqartassaaq, ajunngippallu mattusimajunnaartoqassalluni.
Piffissami kingullermi coronamik tunillatsissimasut marluk paasineqarpoq. Maajip 24-ani tamanut tusarliunneqarpoq, Aasianni innuttaasoq, Danmarkimit tikikkami missortinnermini tunillatsissimasoq paasineqarsimasoq.
Ullualuit kingorna maajip 27-ani alla aamma tunillatsissimasoq paasineqarpoq – tamatumuuna Ilulissani. Taanna tassaavoq illoqarfimmi mittarfiliortuni Munck Gruppnermi sulisoq.