Nunatsinni Nakorsaaneqarfik: Tunillatsissimasut ippigisaqarlutik imerniartarfimmiillutillu allanut pulaartarsimapput

Covid-19-ip malunniutaanik ippigisaqaraanni ingerlaannartumik imminut mattunnissaq pingaaruteqarpoq, Paneeraq Noahsen Nunatsinni Nakorsaaneqarfimmeersoq tusagassiortunik katersortitsinermi oqarpoq.

Nunami napparsimmaviit inunnit coronavirusimut misissortikkusuttunit maannakkorpiaq siannguffigineqartupilussuupput.

Peqqissutsimut Naalakkersuisup Kirsten L. Fenckerip (N) pingasunngornermi tusagassiortunik katersortitsinermi oqaatigaa, tunillatsissimasumut qanimut attaveqarsimasut oqartussanit attavigineqassasut:

- Pinartumik napparsimasut peqqinnissaqarfimmut attaveqarniarnertik ajornartorsiutigaat. Oqartussat assigiinngitsut eqqissillutik sulisariaqarput.

- Inuit Covid-19-imut atatillugu ippigisallit piaarnerpaamik misissorneqarnissaat anguniarlugu peqqinnissaqarfimmi sulisut tamaviaarlutik sulipput. Tulliullugit inuit tunillatsissimasunut qanimut attaveqarsimasut tikissimasullu misissorneqarnissaat salliutinneqassaaq, Kirsten L. Fencker oqarpoq.

- Tunillatsittartut sukkasoorujussuarmik amerliartortut

Paneeraq Noahsenip Nunatsinni Nakorsaaneqarfimmeersup oqaatigaa, innuttaasut tuniluuttoqarnera pimoorullugu tigussagaat, Covid-19-imillu ippigisaqarunik misissortissasut:

- Tunillatsittartut sukkasoorujussuarmik amerliartorput, nunamilu tamarmi maannakkorpiaq inuit 26-t coronamik napparsimapput, Paneeraq Noahsen oqarpoq, tunillatsissimasullu suli amerlanerulissasut naatsorsuutiginerarlugu:

- Misissuisarnitsinni arlaleriarluta takusarparput, tunillatsissimasut tunillatsissimanerminnit ippigisaqaraluarlutik katerittunut peqataasartut, ikinngutiminnut nalunngisaminnullu pulaartartut, cefeeniillutillu neriniartarfinniittartut aamma imerniartarfinniittartut.

- Taamaalillutik inuppassuit tunillatsinnissamut aarlerinartorsiortippaat, taanna oqarpoq.

Tunillatsissimannginnermik akissutisinermi aatsaat mattusimajunnaartoqassasoq

Paneeraq Noahsenip oqaatigaa, ullumikkut tunillatsissimasunit 30-t akiuussutissalerneqarsimanngitsut.

Tamanna tunngavigalugu eqqaasitsissutigaa, ippigisaqaraanni imminut mattuttarnissaq:

- Ippigisaqaraanni imminut mattuttoqartassaaq misissortittoqarlunilu. Tunillatsissimannginnermillu akissutisinermi aatsaat mattusimajunnaartoqartassalluni.

- Tamakkua saniatigut aatsaat taamak pingaaruteqartigilerpoq, immitsinnut paasinissarput, allanut qanillinaveersaarnissarput assattalu spritertarnissaai, Paneeraq Noahsen kaffillertunukartarnissap killilersimaanissaanik aamma katerilluni suliaqartunut peqataanissap sapinngisamik minnerpaaffianiitinnissaanik kaammatuuteqartoq oqarpoq.

Allanut qanimut attaveqartarneq killilerlugu sapinngisamik minnerpaaffianiitiguk

Powered by Labrador CMS