Nunatsinni Nakorsaaneqarfik: Kangerlussuarmi immikkoortitsisarnissaq suli sulissutigineqarpoq

Naalakkersuisut Silittaasuat tallimanngornermi ullup-qeqqanut coronap killiffia pillugu tusagassiortunik katersortisinermi nuannaarluni aallarniivoq:

- Ippassaq paasitinneqarpugut Kalaallit Nunaanni tunillatsissimasuerussimasoq. Tamanna ammaaqqinnissatsinnut ullut quliinnanngortut nutaasiassatsialaavoq, Kim Kielsen oqarpoq.

Danmarkimut timmisartuussisarnerit aallarteqqinneqarnissaannut atatillugu ernummatigineqarsinnaavoq, angalasut Kangerlussuarmi imminnut qanippallaannginnissaasa qanoq pinngitsoortinneqarsinnaanera.

Periarfissanik misissuisoqartoq

Paneeraq Noahsen Nunatsinni Nakorsaaneqarfimmeersoq oqaluttuarpoq, periarfissanik suli misissuisoqartoq:

- Ilaasunik immikkoortitsisarnissaq suli sulissutigineqarpoq, Paneeraq Noahsen oqarpoq.

Danmarkimi maanna piumasaqaataalerpoq, ilaasut junnip 15-iat aallarnerfialugu Danmarkimi timmisartoqarfimiimminni qanerminnut assiaquteqartarnissaat. Inassuteqaalli tamanna nunami maani atuuttussatut isikkoqanngilaq:

- Pingaarnerpaavoq immitsinnut qanillivallaannginnissarput aamma ikusitsinnut tangajorlutalu quersortarnissarput. Taamaammat siunertamut naapertuuppallaanngitsutut tamanna isigaarput, Paneeraq Noahsen oqarpoq.

Akitsuuteqanngitsunik pisiniartarnermut pilersaarutissat oqaluuserineqartut

Paneeraq Noahsen aamma aperineqarpoq, Kangerlussuarmi akitsuuteqanngitsunik pisiniarfimmi inuppassuaqarfiusartumi qanoq iliuuseqartoqarniarnersoq.

Tamannali erseqqinnerusumik oqaaseqarfigisinnaannginnerarpaa:

- Iliuusissatut pilersaaruti, ajoqutaasinnaasut iluaqutaasinnaasullu eqqarsaatigalugit oqaluuserineqarput, piareeriarpatalu tamanut saqqummiunneqassallutik, Paneeraq Noahsen oqarpoq.

Kim Kielsenip tamanna nangillugu innersuussutigai, to meterimik immitsinnut qanillivallaannginnissamik malittarisassat nalinginnaasut, tamannalumi pisiniarfinni aamma erseqqissaatigineqartartoq.