Nunatsinni Nakorsaaneqarfik amerlanerusunik aningaasaliiffigineqartassasoq

Nunatsinni Nakorsaaneqarfik aappaagu amerlanerusunik aningaasaliiffigineqarnissamik, sulisut marlunnik ilaneqarnissaannik kiisalu suliassaqarnerulernissamik naatsorsuuteqarsinnaavoq. 2021-mut Aningaasanut Inatsisissatut Siunnersuut naapertorlugu, Nunatsinni Nakorsaaneqarfimmut aningaasaliissutaasartut 1,35 mio. koruuninik amerlineqassapput.

Politikkerit isumaqatigiissutigisinnaassappassuk, Nunatsinni Nakorsaaneqarfiup naatsorsuutigisinnaavaa 2021-miit suliassaminut amerlanerusunik aningaasaliiffigineqarnissaq.

Nunatsinni Nakorsaaneqarfik ingerlatsinermut ullumikkut Aningaasanut Inatsit aqqutigalugu 4,4 millioner koruuninik aningaasaliiffigineqartarpoq. Aningaasanut Inatsimmi Nunatsinni Nakorsaaneqarfimmut aningaasaliissutaasartut 2021-mi tamatumalu kingorna 5,8 millioner koruuninut qaffanneqassapput. Aningaasat ilassutaasut malitsigisaannik Nunatsinni Nakorsaaneqarfimmi sulisut marlunnik ilaneqassapput.

- Nunatsinni Nakorsaaneqarfik suliassanik arlalinnik isumaginnittareerpoq, soorlu nakkutilliinermik, paasititsiniaanermik il. il.. Taamaammat sulisut amerlanerit pisariaqartinneqarput. Qinngornernut illersornissaq pillugu inatsit atuutsilerniarlugu suliaqarneq, assersuutigalugu Peqqissutsimut Naalakkersuisoqarfimmiit Nunatsinni Nakorsaaneqarfimmut nuunneqarsimavoq, Peqqissutsimut Naalakkersuisoq Anna Wangenheim Sermitsiaq.AG-mut oqarpoq.

Tulliuttut Nunatsinni Nakorsaaneqarfiup suliassaanut ilanngunneqassapput suliaqartarneranulluunniit pitsanngorsaataassapput:

Qinngornernut tunngatillugu inatsimmik suliaqartarneq sulisumik ataatsimik ilalerlugu nuunneqassaaq

Tuniluuttoqarnera pillugu suliaqarneq pitsanngorsaaffigineqassaaq

Naammagittaalliornissamut Taarsiiffigitinnissamullu inatsit

Nakkutilliineq

Paasititsiniaalluni suliaqarnerunissaq

- Nunatsinni Nakorsaaneqarfiup akisussaaffeqarnerulerlunilu suliassaqarnerulersup atukkatigut pitsanngorsaaffigineqarnissaa pingaaruteqarpoq, Anna Wangenheim oqarpoq.

1,35 millioner koruuniusunit 750.000 koruunit Peqqissutsimut Naalakkersuisoqarfimmi konto pingaarnermit nuunneqassapput. Aningaasat siunnersorteqarnermut atorneqartartut tatens Institut for Strålebeskyttelsemit Nunatsinni Nakorsaaneqarfimmut nuunneqassapput. Tamakkua saniatigut Nunatsinni Nakorsaaneqarfimmi sulisut ataatsimik ilaneqassapput, Naammagittaalliornissamut Taarsiiffigitinnissamullu Inatsimmut nutaamut atatillugu.

Inatsisip pineqartup 2022-mi atuutsinneqalernissaa naatsorsuutigineqarpoq. Nunatsinni Nakorsaaneqarfimmut aningaasaliissutit annertusineqarnissaanut pisariaqarpoq, 2021-mi Aningaasanut Inatsisissatut Siunnersuutip taamatut isikkoqartillugu akuerineqarnissaa.

Powered by Labrador CMS