Nunatsinni Nakorsaaneq: Angalareernermi misissortinnissaq inuup nammineq akisussaaffigaa
Oqartussat innuttaasut nunamut tikinneranni misissuisarnissamut atortorissaarutit nutaat atuutsinneqalernissaat sulissutigaat, kikkulli tamarmik misissortinnissamut aggersarneqartassanngillat, Nunatsinni Nakorsaaneq ilisimatitsivoq.
Atortorissaarutit nutaat angalasut Kalaallit Nunaannut tikinneranni coronamik tunillatsissimanersut misissoqqinneqarnerannut atorneqartassapput.
Angalasulli nammineq aalajangertassavaa misissorteqqissanerluni imaluunniit piffissami sivisunerusumi mattusimasassanerluni, Nunatsinni Nakorsaaneq oqarpoq:
- Pinngitsoorani misissorteqqittoqartariaqannginnera attatiinnarparput. Ulluni 14-ini angerlarsimaannarnissaq aalajangerneqarsinnaavoq.
- Piffissamik tunineqarluni misissorteqqinnissamut neqerooruteqartarluni aaqqissuussisoqarniarpoq - apeqqutaalluni timmisartumut sorlermut ilaasimanerluni. Tamatumunnga peqatigitillugu inniminniisarnissaq sulissutigaarput, tassa nammineerluni qaqugukkut misissorteqqissanerluni aalajangerneqarsinnaanngorlugu, Nunatsinni Nakorsaaneqhenrik L. Hansen tusagassiortunik katersortitsinermi oqaluttuarpoq.
- Toqqaannartumik aggersaasoqartarnissaanik pilersaaruteqartoqanngitsoq
Tusagassiortunik katersortitsinermi nunatsinni nakorsaanerup Naalakkersuisullu Siulittaasuata Kim Kielsenip ilisimatitsissugitaa, ukiup affaani tunillatsittoqarsimanngeriarluni Nuummi coronavirusimik tunillatsittoqarsimasoq.
Danmarkimit tikissimasoq matumani pineqarpoq, taannallu Kalaallit Nunaannut tikinnerminit ullut tallimat qaangiummata misissorteqqissimavoq. Malittarisassat inassuteqaatillu tamarmik malinneqarsimasut, Henrik L. Hansenip oqaluttuaraa.
AAMMA ATUARUK: Nunatsinni Nakorsaaneq: Tunillatsittoqarsimanerata takutippaa corona tuniluuteriaannaasoq
Tusagassiortunik katersortitsisoqarmat nunatinni nakorsaaneq aperineqarpoq, tunillatsissimasut tamarmik paasineqassappata, Kalaallit Nunaannut tikittut tamarmik misissortinnissamut aggersarneqartarnissaat oqartussanit eqqarsaatigineqarnersoq.
Nunatsinnili nakorsaanerup erseqqissaatigaa,angalasut ataasiakkaat namminneq aalajangertassagaat, ullut tallimat qaangiunneranni misissorteqqissanerlutik imluunniit ulluni 14.-ini angerlarsimaannartassanerlutik:
- Toqqaannartumik aggersaasoqartarnissaanik pilersaaruteqartoqanngilaq. Taamaaliortoqartassappammi unammilligassarpassuaqartussaavoq, aalajangiussimasariaqarparpullu inuit ataasiakkaat Kalaallit Nunaannut uteraangamik allanik tunillaannginnissartik akisussaaffigimmassuk, Henrik L. Hansen oqarpoq.