Nunatsinni Nakorsaaneq: Allanik tunillatsittoqarsimanngilaq

Allanik tunillatsittoqarsimanngilaq, Nunatsinni Nakorsaaneq ataasinngornermi ullup qeqqanut tusagassiortunik katersortitsinermi, misissugassatut tiguneqarsimasut 29-t kingulliit tunngavigalugit ilisimatitsivoq.

Misissugassatut tigusat 29-t akissutaat tiguneqarsimapput, tunillatsittoqarsimanngilarlu, ataasinngornermi tusagassiortunik katersortitsinermi Naalakkersuisoq Karl Frederik Danielsen ilisimatitsivoq.

Nunatsinni Nakorsaanerup Henrik L. Hansenip itisiliilluni Nuummi inissisimanermut atatillugu oqaatigaa, inuit maannamut aqqanillit tunillatsissimasut paasineqarsimasoq.

- Soorlu nalunngikkissi inuit aqqqanillit tunillatsissimasut paasineqareersoq. Taakku tamarmik nunamut isersinnaanerup mattunneqannginneranili tunillatsissimapput, Nunatsinni Nakorsaaneq Henrik L. Hansen oqarpoq.

- Nunamut isersinnaaneq mattunneqareersoq tunillatsittoqarsimarpasinngilaq, taamaammat isumaqarpugut iliuuserput ajunngitsuusoq, Henrik L. Hansen oqarpoq.

- Tunillatsittoqarsimanersorli paasiniarlugu annertuumik misissuivugut. Pingaaruteqarporlu eqqarsaatigissallugu, tunillatsissimasut siulliit pingasut paasigatsigilli tuniluuttoqarneranik takusaqannginnerput. Tunillatsittoqaqqaarneranit piffissaq sivisooq ingerlareermat neriuutigaarput tuniluuttoqalissanngitsoq, Nunatsinni Nakorsaaneq oqarpoq.

Maleqquneqartut maliinnarneqarnissaat

Nunatsinni Nakorsaanerup oqaluttuaraa, tunillaassortup pilerfii maluusimasut:

- Soorlu oqareersunga, piffissaq sivisooq ingerlareerpoq, tunillatsissimasutullu paasineqartoq kingulleq martsip qaammataata naanerani pivoa, Henrik L. Hansen Oqarpoq.

Erseqqissaatigaa inassuteqaatinik malinniinnarnissaq maanna pisariaqartoq:

- Nunamulli isertut nassataannik, tuniluunneq aallateqqissinnaavoq. Taamaammat pingaaruteqarluinnarpoq, malittarisassat tamarmik suli malinneqarnissaat. Ataatsimuli tamaasa isigalugit, iliuuserisimasavut tamarmik sunniuteqarsimasutut isikkoqarput, Nunatsinni Nakorsaaneq oqarpoq.

Naalakkersuisup Karl Frederik Danielsenip tusagassiortunik katersortitsinermi ilanngullugu oqaluttuaraa, malittarisassatut aalajangiiffigineqarsimasut innuttaasunit malinneqartussat allannguuteqanngikkallartut.

Danielsen naapertorlugu, Kim Kielsen aqangu marlunngornermi tusagassiortunik katersortitsinermi peqataassaaq, inerteqqutit killilersuinerillu atuuttut pillugit nutaanik saqqummiussissalluni.

Kilde: nun.gl
Powered by Labrador CMS