Nunatsinni nakorsaaneq abekoppit pillugit: Abekoppeqartoqalereersimasinnaagaluarpoq
Danmarkimi abekoppeqartut amerliartorput. Kalaallit Nunaanni abekoppillit siulliit qanittukkut takussagivut Nunatsinni nakorsaaneq siulittuivoq, akiuussutissanilli uninngasuuteqartoqanngilaq.
- Nappaatip nunami maani atugaalernissaa ilimanarluinnarpoq.
Nunatsinni nakorsaaneq Henrik L. Hansen taamatut oqarpoq.
Kisitsisit kingulliit, Danmarkimi inuit 101-it abekoppimik tunillatsissimasut takutimmassuk taamatut oqaaseqarpoq.
- Abekoppeqartoqalereersimasinnaagaluarpoq, nunatsinni nakorsaaq oqarpoq, nangillunilu oqaatigalugu nappaatip tuniluunnera maannakkorpiaq ulorianartorsiortitsinngitsoq.
Danmarki naammattumik iliuuseqarsimanngitsoq
Tamatumunnga pissutaavoq, abekoppit atoqatigiinnikkut tuniluuttarnerat, taamaammallu assersuutigalugu coronatulli tuniluutipallassinnaanani. Nunatsinni nakorsaanerup ilimagaa, nappaat Kalaallit Nunaanni tuniluutilissagaluarpat, tuniluunnera sukkasuumik unitsinneqarsinnaasoq.
- Nappaat amerlanertigut ajorluinnartumik kinguneqartanngilaq. Afrikap avataani toqusimasut amerlanersaat allamik ajoquteqarnertik pissutigalugu toqusimapput, nappaatilli tuniluunnera qanimut malinnaaffigaarput.
Kalaalerpassuit aasaanerani Danmarkimi sulinngiffeqarput, oqartussallu periusissiaminnik allannguisariaqarsimapput - Peqqissutsimut Aqutsisoqarfimmi pisortap tullia Helene Bilsted Probst naapertorlugu - abekoppit tuniluutsinnaveersaarniarlugit Danmarkimi naammattumik iliuuseqartoqarsimannginnera pissutigalugu.
Aliuussutissanik uninngasuuteqarneq uninngasuuteqannginnerluunniit
Angalasut nappaammik nunamut eqqusseqqaartussaapput, Henrik L. Hansen Nunatsinni nappaatip tuniluutilernissaanik ilimaginnilluinnartoq oqarpoq.
Nunatsinni nakorsaanerup ilisimatitsissutigaa, akiuussutissanik uninngasuuteqartoqanngitsoq, pisariaqartinneqaleriarpatali timmisartoq siulleq aqqutigalugu tikisinneqassasut oqaluttuaralugu.
- Soorunami akiuussutissanik uninngasuuteqartariaqassaagut, maakkorpiarli nalilerneqarpoq tuniluuttoqarnera aqunneqarsinnaasoq, tassani akiuussutissat timmisartoq siulleq aqqutigalugu tikisinneqarsinnaatillugit, Henrik L. Hansen nassuiaavoq.
Nunatsinni akiuussutissanik uningaasuuteqarnissaq pisarianngissinnaasoq
Nakorsaanerup oqaatigaa, akiuussutissanik Nuummi uninngasuuteqarnissaq imaassinnaasoq pisariaqanngitsoq.
- Niimmiit assersuutigalugu Uummannamut akiuussutissanik nassiussineq, Danmarkimiit Uummannamut nassiussinertulli ajornakusoortigisinnaavoq, nunatsinni nakorsaaneq inerniliivoq.
Ulloq 23. maj Danmarkimi abekoppeqalersimasut siulliit paasineqarput.