Nunatsinni Nakorsaaneq Aasiaat pillugu: Pisariaqanngitsumik tunillatsittoqarnavianngilaq
Nunatsinni Nakorsaaneq Henrik L. Hansen naapertorlugu, Aasianni coronavirusimik tunillatsittoqarsimaneranut atatillugu tuniluuttoqalersinnaanera annikitsuaraavoq. Tunillatsittoqarsimanera, politikkerit juunip 15-iani imarpik ikaarlugu timmisartuusseqqittoqartalernissaanik pilersaarutaannut allannguinngilaq.
Nunatsinni Nakorsaanerup Henrik L. Hansenip ataasinngornermi tusagassiortunik katersortitsinermi, Aasianni coronavirusimik tunillatsittoqarsimera erseqqinnerusumik oqaluttuaraa.
Nunatsinni nakorsaaneq naapertorlugu pisoq malinnaaffigineqarpoq, aamma tuniluuttoqarsinnaanera annikitsuaraavoq:
- Aasianni pisoq malinnaaffigineqarpoq. Kinaluunniit asuli tunillatsinnavianngilaq. Tunillatsissimasoq sisamanngormat maanga tikippoq. Isumaqarpugulli tuniluuttoqarsinnaanera annikitsuaraasoq. Imaassinnaavoq tuniluuttoqanngitsoq, Henrik L. Hansen oqarpoq.
Tikikkami misissortinnermini tunillatsissimasoq paasineqartoq
Nunatsini nakorsaanerup oqaluttuaraa, pineqartoq Danmarkimit aallartinnani marloriarluni misissortissimasoq, tunillatsissimaneranillu takussutissaqarsimanngitsoq. Kalaallit Nunaannut tikinnerani misissueqqittoqarsimavoq, tassanilu tunillatsissimasoq paasineqarluni.
Nunatsinni nakorsaanerup tassunga atatillugu oqaluttuaraa, inuit tikinnerminni misissorneqartarnerat nalinginnaasuunngikkaluartoq:
- Tikinnermi misissorneqartarneq nalinginnaasuunngilaq, nassuiaatissaqartinngilaralu sooq misissuisoqarnissaanik aalajangertoqarsimanersoq. Henrik L. Hansen oqarpoq.
Timmisartumi tunillaassuisoqarsinnaanera aarlerinarpallaanngitsoq
Nunatsinni nakorsaaneq tusagassiortunik katersortitsinermi aperineqarpoq, sisamanngormat Kalaallit Nunaannut timmisartumik ingerlaarnermi tunillaassuisoqaqqissinnaanersoq.
Nunatsinni nakorsaanerup tassunga atatillugu oqaatigaa, timmisartumi tunillaassuisoqarsimaneranik uppernarsaateqartoqanngitsoq, aamma tunillaassuisoqarsinnaanera aarlerinarpallaanngitsoq:
- Maanna timmisartumik tunillaassuisoqarsimaneranik ataatsimilluunniit assersuutissaqartoqanngilaq. Tamanna pisinnaanngitsutut oqaatigineqarsinnaanngilaq, nunarsuarmili ilisimasalinnit paasissutissat pigisavut naapertorlugit, tamanna imatut ernummatiginngilarput, Henrik L. Hansen oqarpoq.
Ammaaqqinnissamut pingaaruteqanngitsoq
Nunatsinni Nakorsaanerup aamma Naalakkersuisut Siulittaasuata Kim Kielsenip (S) oqaatigaat, tunillatsittoqarsimanera juunip 15-iani ammaqqinnissaq pillugu pilersaarummut sunniuteqanngitsoq.
- Inassuteqaatit naapertorlugit iliuuseqarpugut, oqaatigereerparpullu juunip 15-iani ammassasugut. Ilisimatinneqarsimavugut, Aasianni tunillatsittoqarsimaneranut atatillugu malittarisassat malinneqartut. Taamaammat ammaaqqinnissamik pilersaarutitta malinneqarnissaanut akerliusumik tunngavissaqanngilaq, Kim Kielsen oqarpoq.
- Piffissami matumani tunillatsissimasunik tikittoqartassaaq. Tamanna upperaara. Tunillatsissimasunilli isumaginninnissamut piareersimavugut. Taamaammat ammaaqqinnissamik pilersaarupput ingerlatiinnarniarparput, Henrik L. Hansen oqarpoq.
Kielsen Aasiammiunut: Toqqissisimassaasi
Kim Kielsen tusagassiortunik katersortitsineq naggaserlugu, Aasianni innuttaasunut nalunaaruteqarpoq:
- Toqqissisimallusilu eqqissisimassaasi. Tunillatsissimasunik nunamut tikittoqartarnissaa naatsorsuutigereerparput. Tunillatsissimasup kikkunnik attaveqartarsimanera nakkutigilluarneqarpoq. Taamaammat pisumi matumani tamatta eqqissisimasariaqarpugut.
- Piffissami sivisuumi tunillatsittoqarsimanngilaq, maanna eqqaasinneqarpugut coronap suli atuunneranik. Taamaammat pingaaruteqarpoq inassuteqaatinik malinninnissaq immitsinnullu paarinissarput, Kim Kielsen oqarpoq.