Nunatsinni Michelinimik ulloriaqalernissaq anguniagaavoq
World of Greenland, Hotel Arctic Savalimmiunilu neriniartarfik Michelinimik ullorialerneqarsimasoq Koks, suleqatigiillutik Kalaallit Nunaata siullermeersumik Michelinimik ulloriaqalernissaa anguniarpaat.
Air Greenlandip ataani ingerlatseqatigiiffik World of Greenland, ilaatigut Qeqertarsuup Tunuani IIimanami illuaraqarfimmik ingerlatsisoq, taamatuttaarlu Air Greenlandimit pigineqartoq, Ilulissani Hotel Arctic, Savalimmiunilu neriniartarfik Koks, Michelinimik marlunnik ullorialerneqarsimasoq, Kalaallit Nunaata siullermeersumik Michelinimik ullorialerneqarnissaa anguniarlugu qanimut suleqatigiilerput.
Aviisi Sermitsiaq taamatut allappoq.
Taamatut oqaluttuarpoq Koksimi igaffiup pisortaa Poul Andrias Ziska, taannalu nerisassanik isumaginnittuussaaq Koksip 2022-mi 2023-milu aasaanerani Ilimanami neriniartarfeeqqamik Egedemik, inunnut 30-t missaannut inissalimmik, ingerlatsisarnerani.
- Michelinimik ullorialerneqarneq imaaliallaannaq pineq ajorpoq. Ukiut tamaasa anguneqartassaaq. Tamatumunngali pisariaqarpoq Michelinimit inspektørit nerisassanik misigisassarsiortinniarlugit aggertinniarnissaat. Savalimmiunut tikisissinnaasimavavut, neriniartarfiit Michelinimik ullorialerneqarsimasut nunarsuarmi avinngarusimanersaannut – maannalu Michelinip inspektøriinik Kalaalllit Nunaannukartitsinissaq anguniagarilerparput. Isumaqarpugut tamanna iluatsissinnaassasoq, tassami sammisaqarfimmi tamatumani tusaamasaallualaareerpugut, Poul Andrias Ziska Sermitsiamut oqarpoq.
Michelinimik ulloriat marluk
Savalimmiuni neriniartarfik Koks 2019-imi Michelinimik marlunnik ullorialerneqarpoq, ilaatigut sassaalliutertik Tasting Menu, 17-inik immikkoortulik, pissutigalugu – Savalimmiut mikiarsianik nerisassioriaasitoqaannik. (Sermitsiaq 2021/52 takuuk). Najoqqutaq tamanna Ilimanami misilinneqassaaq, nunattali nerisassaataanik tunngavilimmik.
Oqaluttuaq tamaat Sermitsiami sapaatip-akunnerani matumani saqqummersumi atuaruk, ugguuna iserfigisinnaavat:
