Danmarks Regnbue Awardsimi peqatigiiffiup nersornaasiuttagaanik nersornaaserneqarneq upperiuminaappoq. Sipineq+-ip aallartitaani sisamaasuni ataaseq pingasunngornermi nersornaaserneqarneq pillugu taama oqaluttuarpoq.

- Sipineq+ taaneqarmat tupangaarama silaga allaat aallarpoq. Ammukarnitsinni inuit ersaattaatilermata qiiaamminarsuaarpoq. Nersornaatisereerluta uteqqikkatta inginnaveeraluarpugut pilluaqqusisoqangaarmat, siulersuisuni ilaasortaq Erni Kristiansen oqaluttuarpoq.

Taanna oqaluttuarpoq ilimagisimagaluarlugu peqatigiiffik alla nersornaasissasoq. Taakkulu taaneqarpata nuannaaqatigiumallugit issiaqatigisimagaluarpai.

- Tuparujussuaqaagut. Nuannisarujussuaqaagut, nersornaaserneqarneq pillugu oqarpoq.

Suleqateqarnissamik neqeroortoqalereersoq

Sipineq+-imi siulittaasoq, Qillaq Olsen oqaluttuarpoq peqatigiiffik sinnerlugu peqataasut sisamat Danmarkimi peqatigiiffinnit suleqatiserineqartalereersimasut.

- Peqatigiiffipput taama nersorneqarmat nukissamik tunineqarpugut. Suleqateqarsinnaanermut, peqatigiiffinnullu allanut attaveqarnissamik nersornaat ammaassivoq, Qillaq Olsen oqarpoq.

Peqatigiiffik nammineq kajumissuseq atorlugu suleqataaffigineqarpoq, suiaassutsit assigiinngitsut aamma kinguaassiutikkut kinaassutsit assigiinngitsut pillugit kalaallisut oqaasiliortoqarnissaannik ilaatigut suliaqarlutik. Qillaq Olsen isumaqarpoq Danmarks Regnbue Awardsimi nersornaasiineq nunatsinni inuiaqatigiinni ikinnerussuteqartunut aamma akuersaarnermik takutitsisoq.

- Soorunami ilaasortatsinnut ikinnerussuteqartunullu allanut iluaqutaasussaavoq. Aamma naleqassutsimut iluaqutaasussaavoq, Qillaq Olsen oqarpoq.

Peqatigiiffik Danmarkimi Finlandimilu Pride-mik aaqqissuussanut arlalinnut qaaqqusaareerpoq.