Sipineq+, nunatsinni LGBTQ+-mut peqatigiiffik nutaaq Danmarkimi Regnbue Awardsimut innersuunneqarpoq. Peqatigiiffiup 2SLGBTQIA+ pillugit kalaallisut taaguusersuusiornermik suliaqarpoq. Innersuunneqarnerlu tulluusimaarutigaat.

- Dansk Regnbue Awardsimut qinigassanngortinneqarnerput suliniutinik
ilungersuuteqarsimanitsinnut uppernarsaataallunilu kisianni aamma inuiaqatigiinni
allannguinissamut suliaqaqqinnissamut kajumisssuseqarnerulersitsivoq, peqatigiiffimmi siulittaasoq Qillaq Olsen oqarpoq.

Aqqutissani pingaaruteqartoq

Dansk Regnbue Awards LGBTQ+ iluani inuiannut immikkut ittumik
tunniussaqarsimasunik maluginiagaqartarlunilu persuarsiutiginnittarpoq. Nersornaatit 14-it assigiinngitsut Københavnimi 27. september 2023 tunniunneqassapput.

Qillaq Olsen, peqatigiiffimmi siulittaasoq innersuunneqarnermut maniguuppoq.

- Suliatsinni maluginiarneqarneq angusarput annertuvoq. Tassunga atatillugu peqatigiiffitsinnik pilersitseqataasut, siulersuisut, ilaasortat, kajumissutsiminnillu nutserisugut peqatigiiffitsinnut tapersersuinerannut qujaffigerusuppagut. Qinigassanngortinneqarnitsinni taakku tunniusimanerat tapersersuinerallu qitiulluinnarput. Qillaq Olsen oqarpoq.

Sipineq+-ip 2SLGBTQIA+-mut tunngatillugu oqaatsit kalaallisuunngortinnissaannut nassuiaasersornissaannullu Oqaasileriffik suleqatigaat, nutserisunillu pingasunik suleqateqarlutik.

Suli suliassarpassuaqartoq

- Nunatsinniittut kikkulluunniit, qanorluunniit suiaassutsikkut soqutigisaqartut imaluunniit kinguaassiuutitigut kinaassusaat apeqqutaatinnagu, tamarmik akuerineqartutut, ataqqineqartutut paasisinnaaneqartutullu misiginissaannut qulakkeerinninnissamut suliniut alloriarneruvoq, Qillaq Olsen oqarpoq.

Sipineq+ nalingiissitaanerunissamik aamma suliaqarpoq. Ataataaqataasut meeravissiartaarnermi sulinngiffeqartalernissaannik pisinnaatitaaffeqalernissamik suliaqarput, meeqqallu atuarfianni suiaassuseq atoqatigiittariaatsillu pillugit paasissutissat siammasinnerusut aallaavigalugit atuartitsisoqartalernissaannik aamma suliniuteqassallutik.