Nunatsinni inorlutik inunngornikut peqatigiiffiat matusariaqalersinnaasoq

Kalaallit Nunaanni inorlutik inunngornikut peqatigiiffianni siulersuisut peqatigiiffilerinissaminnut piffissaasualerput. Taamaammat peqatigiiffimmi siulittaasussamik nutaamik siulersuisunilu ilaasortassanik nutaanik ujaasilertut, peqatigiiffimmik 2017-imi aallartitsisoq Aviaq Reimer Olsen ilisimatitsivoq.

- Siulersuisuni tunuarnissatsinnut peqqutaavoq sulinitta saniatigut peqatigiiffilerinissamik piffissaasualeratta. Suliniutit arlallit ingerlagaluarput. Suliniutit angisuut ilaatigut ingerlakkaluarpagut, naammassinissaanulli naammattumik piffissaqarata nassuerutigisariaqarparput ukiup kingulliup ingerlanerani inuunerisagut allanngungaatsiarsimammata, Aviaq Reimer Olsen Sermitsiaq.AG-mut nassuiaavoq.

Taanna ilinniakkaminik naammassinneqqammerpoq, kulturilernermi inuiaqatigiillu oqaluttuarisaaneranni kandidatinngorsimalluni.

- Meeraqarpugut inorlutik inuunikunik, taamaattumillu immikkut pisariaqartitsisunik. Taamaattumik nassuerutigisariaqarparput allat peqatigiiffilerilernissaat pisariaqartikkatsigu, oqarpoq.

Suliniutit angisuut ingerlapput

Inorlutik inunngornikut peqatigiiffiannut angajoqqaat inorlutik inunngornikunik meerallit siunnersorneqarumallutik saaffiginnittarput. Peqatigiiffiup meeqqap peqqissisusaanut tunngasunut, erninermut atatillugu sulinngiffeqarnermut inuunermullu allanngorluinnarsimasumut tunngasutigut siunnersuisarpoq.

Siunnersuinerup saniatigut nunarsuaq tamakkerlugu inorlutik inunngornikunut ulloritinneqartumut, 17. novemberimi pisartumut, peqatigiiffik paasititsiniaanissamik siunertaqarluni malunnartitsinissamik aaqqissuussisarpoq. Peqatigiiffiup maanna sulissutigaa Danmarkimiit nakorsaq inorlutik inunngornikut pillugit immikkut ilisimasalik Nuummut, meeqqat inorlutik inunngornikut kingunerluutigisinnaasaat pillugit oqalugiartortinnissaa.

- Neriuutigaara nutaanik siulersuisoqalissasoq. Peqatigiiffilli unitsiinnarneqassagaluarpalluunniit uanga suliniuteqarnera unitsissanngilara. Suli siunnersuisarnernik ingerlataqarumaarpunga, Aviaq Reimer Olsen oqarpoq.

Taanna nassuiaavoq peqatigiiffik inatsisissanut nutaanut tusarniutinik tunniussaqarnissamut periarfissaqartartoq, meeqqat inorlutik inunngornikut inatsimmi iluaquserneqarnissaat pillugu.

- Assersuutigalugu inuit innarluuteqartut pillugit inatsisaanni nutaamik nappaateqartutut nalilerneqarsimanngikkaluarluni pisariaqartitsineq aallaavigalugu ikiorserneqarsinnaalerput. Tassa taakkuusinnaapput meeqqat inorlutik inunngornikut immikkut ittumik pisariaqartitsisut. Tamannalu angusaq ajunngilluinnarpoq, oqarpoq.

Aviaq Reimer Olsenip saniatigut Siila Geisler Vold aamma Gorm Geisler Vold siulersuisuni ullumikkut ilaasortaapput.

Peqatigiiffik nutaanik siulersuisoqalinngippat 1. juni matusussanngorpoq.