Skip to main content

Nunatsinni inissiisarfiit qimminik ikiaroornartunik ujaasisartunik peqalissapput

Kalaallit Nunaanni pineqaatissinneqarsimasunut inissiisarfinnut ikiaroornartunik eqqussisarneq akiorniarlugu Pinerluuteqarsimasunik Isumaginnittoqarfik qimmimik ikiaroornartunik ujaasisartussamik pissarsinissamut aningaasaliiffigineqarsimavoq.

Inatsisinik atuutsitsinermut ministeeriaqarfiup inatsisissatut siunnersuutaa suliniutinik arlalippassuarnik imaqarpoq, ilaatigut Kalaallit Nunaanni pinerluuteqarsimasunut inissiisarfinni imigassamik ikiaroornartunillu atornerluisarnerup taamaatinneqarnissaanik suliniummik imaqarluni .

Danskit 2021-mut aningaasanut inatsisaanni, Kalaallit Nunaanni qimmimik ikiaroornartunik ujaasisartumik pissarsisoqarnissaa anguniarlugu aningaasanik immikkoortitsisoqareersimavoq, tamanna inatsisisssatut missingiummut tusarniaassutigineqaqqammersumut nassuiaatini atuarneqarsinnaavoq.

Qimmeq sungiusarneqaqqaassasoq

- Suliniummut aningaasaliissuteqartoqarsimanera nuannaarutigeqaarput. Ukiulli aappaa avillugu ingerlaqqaassaaq, qimmip ikiaroornartunik ujaasisartussap pissarsiaralugulu pineqaatissinneqarsimasunut inissiisarfitsinni ikiaroornartunik anngiortumik eqqussisoqarsimasinnaaneranik nassaarniarnitsinni ikiuunnissamut sungiusarneqareersimanissaanut, Kalaallit Nunaanni Pinerluuteqarsimasunik Isumaginnittoqarfimmi pisortaq Naaja H. Nathanielsen Sermitsiaq.AG-mut ilisimatitsivoq.

Qimmeq ikiaroornartunik ujaasisartussaq Ilulissanut Nuummulluunniit inissinneqassanersut suli aalajangiiffigineqanngilaq. Naaja H. Nathanielsenilli erseqqissaatigaa, qimmeq soorunami inissiisarfinnut tamanut nooqattaartillugut timmisartuunneqartassanngitsoq, sumiiffimmili ataatsimi inissisimaannassasoq. Danmarkimi Pinerluuteqarsimasunik Isumaginnittoqarfiup qimminik sungiusaasartuisa qimmeq sorleq atorneqassanersoq toqqassavaat, tamatumalu kingorna sungiusarlugu.

Quunik misissuisoqartassasoq

Qimmeq ikiaroornartunik ujaasisartoq kisimi suliniutigineqanngilaq. Inatsisissatut siunnersuut naapertorlugu aamma pinerluuteqarsimasunut inissiisarfimmiittunut pulaartut misissorneqartarnerat annertusineqassaaq, kiisalu inissiisarfinni nakkutilliisut pasitsaassisoqarnerani inissinneqarsimasut anersaartortillugit misissorsinnaalerlugillu quuinik misissuisinnaalissapput.

- Misissuisarnertigut Kalaallit Nunaanni Pinerluuteqarsimasunik Isumaginnittoqarfik inissinneqarsimasut imigassamik ikiaroornatumillu il. il. anngiortumik eqqussillutillu atuinerannut sunniuteqarluartumik iliuuseqarsinnaanngussaaq, inatsisissatut siunnersuummut nassuiaammi allassimavoq, siunnersuut Inatsisartut upernaakkut ataatsimiinneranni aamma Folketingip tullissaani ataatsimiinnerani saqqummiunneqassasoq naatsorsuutigineqarpoq.

Oqartussaaqataaneq avaqqunneqarsinnaasoq

Inatsimmi nutaami pingaarutilik alla aamma ilannguneqarsimavoq, tassa Pinerluuteqarsimasunik Isumaginnittoqarfiup oqartussaaqataanermik avaqqutsinissamut periarfissaqarnerulissaaq, soorlu pineqaatissineqarsimasup najugarisami qanittuani inissinneqarsinnaanera pinngitsoortissinnaanngorlugu.

- Inatsisissatut siunnersuummi (…) siunertarineqarpoq, pineqaatissinneqarsimasup suliffeqarfigisimasami qanittuani imaluunniit pineqaatissinneqarsimasoq suliffeqarfimmi sulisumut qanigisamulluunniit pinerluuteqarsimappat tassunga qanittumi inissinneqarnissaa pinngitsoortinniarlugu oqartussaaqataanermik avaqqutsinissamut periarfissaqarnerulersitsinissaq, inatsimmut nassuiaammi inatsisinik atuutsitsinermut ministerip Nick Hækkerupip Folketingip Kalaallit Nunaannut tunngasutigut Ataatsimiititaliaanut ilisimatitsissutigisimasaani allassimavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER