Kalaallit Nunaanni attanneqarsinnaasumik illersornissamut politikkeqarnissaq anguneqassappat susoqassava?

Apeqqut taanna ataasinngorpat, Ilisimatusarfik, Dansk Institut for Internationale Studier (DIIS) Forsvarsakademiilu illersornissamut politikki pineqartillugu Danmarkip Kalaallillu Nunaata akornanni akisussaaffiit avinneqarsimanerat ataqatigiissaarneqarsimanerallu pillugit oqallitsitsineranni sammineqassaaq.

Pisussat

Ulrik Pram Gad (DIIS): Aqutsisoq

Sara Olsvig (Ilisimatusarfik): Kalaallit Nunaat illersornissamut politikkeqarpoq, attassinnaasunngortinneqassaarli

Jeppe Strandsbjerg (Center for Arktiske Sikkerhedsstudier, FAK): Forsvarsakademi (tbc) suleqatigalugu piginnaasanik ineriartortitsineq

Rasmus Leander Nielsen (Ilisimatusarfik): Nasiffik sumut atuuppa?

Q/A

DIIS tusagassiorfinnut nalunaaruteqarluni ilisimatitsivoq.

Ilisimatuut naapertorlugit, nunat pissaanilissuit Issittumi pissaaneqarniunnerisigut naalagaaffeqatigiit unammilligassarpassuaqartut.

- Illersornissamut politikki naalagaaffimmit akisussaaffigineqartoq pingaarnertut oqaluuserisassaavoq, aalajangiiffigisassanulli Kalaallit Nunaat aatsaat peqataatinneqarsinnaappat atuuttussanngortinneqartassalluni, DIIS allappoq.

Ajornartorsiut taannarpiaq ukioq manna siusinnerusukkut sammineqangaatsiarpoq, taamanikkut Folketingimi aalajangiunneqarmat, issittumi piginnaasanik annertusaanissamut en milliard koruunit missaanniittunik immikkoortitsisoqassasoq Naalakkersuisut naammaginninnatik oqaaseqarput.

- Naalakkersuisuusimasut Inatsisartuni amerlanerussuteqalaaginnartut imaassinnaavoq tusarniarneqarsimasut. Naalakkersuisunngortulli nutaat tamanna pillugu oqaloqatigineqarsimanngillat. Sakkulersortoqannginnissaa pillugu erseqqissumik periusissiaqarpugut, aamma Kalaallit Nunaanni dronit atorneqarnissaat, illersornissamut ilinniartitsisoqarnissaa danskilluunniit sakkutuuisa nunatsinniinnissaat soqutigisarinngilarput, taamanikkut nunanut allanut naalakkersuisuusoq Pele Broberg TV2-mut oqarpoq.

Tamatuma saniatigut Naalakkersuisut aamma Illersornissaqarfimmut piumasarisimavaat, nunami maani sakkutuunngorniarnissamut misiliisitsisarnerit unitsinneqassasut.

Ataasinngorpat aaqqissuussinermi illersornissamut politikki sammineqarluassaaq, ilisimatoorlu Ulrik Pram Gad DIIS-imeersoq aamma Sara Olsvig Ilisimatusarfimmeersoq aqutsisuullutillu aaqqqissuussinermi oqalugiartassapput, Ilisimatusarfimmi aaqqissuussaq pissaaq 10.30-12:00, tamanullu ammalluni.

Pisussat uani paasisaqarfiginerukkit.