Pituffik

Nunatsinni iliuuseqarnerup aamma suliap kinguartinneqartup sanaartornermik suliaqartoq eqqorpaa

Suliffeqarfissuup MT Højgaardip ukiumut 2016-imut nalunaarutini sisamanngornermi saqqummiuppaa, tassanilu kisitsisit pitsaagisassaavallaanngillat

Ukioq kingulleq sanaartornermik suliaqartumut MT Højgaardimut ukioq pitsaasuunngilaq

Ukioq kingulleq sanaartornermik suliaqartumut MT Højgaardimut ukioq pitsaasuunngilaq, sulianik kinguartitsisoqarpoq aamma nunatsinni sulianik naalleraasoqarpoq.

Suliffeqarfissup ukiumut 2016-imut nalunaarutini sisamanngornermi saqqummiuppaa, tassanilu kisitsisit pitsaagisassaavallaanngillat.

Ukioq naatsorsuutigisatut ingerlasimanngilaq, tamannalu naammaginanngilaq, suliffeqarfissuup pisortaa Torben Biilmann oqarpoq.

- Pitsaasumik ineriartorneq 2016-imi ingerlateqqissallugu naatsorsuutigigaluarparput, kisianni qanoq ajornartigisinnaanera piareersimaffigisimanngilarput, naatsorsuutini taanna oqarpoq nangillunilu:

- Ukiup aallartinnerani angusassatut naatsorsuutigut aamma eqqortinngilagut, tamannalu naammaginanngilluinnarpoq.

Ukioq suliniutinik kinguaattoorfiullunilu unitsitsiffiusoq taassuma tikkuarpaa.

Tamatuma saniatigut Pituffimmi kiffartuussinermut isumaqatigiissut assortuussutaavoq, tamannalu MT Højgaardimut akisuvoq. Ingerlatseqatigiiffik isumaqatigiissuteqartoq kaaviiaartitanik 300 millionit koruuninik annaasaqarpoq.

Isumaqatigiissut Amerikami naalakkersuisunut 2015-imi isumaqatiginninniutigineqaqqinnerata tamanna kinguneraa. USA-mi sakkutuut kiffartuussisoq alla toqqarmagu, MT Højgaardip isumaqatigiissut annaangajappaa.

Politikkikkut suaaruteqartoqarnerata noqqoruuttoqarneratalu kingorna MT Højgaardip isumaqatigiissut tigummiinnarpaa, allatulli ilusilerlugu. Ingerlatseqatigiiffiup maanna utaqqiisaasumik isumaqatigiissutissaq suliaraa, taanna 2017-ip naanerani atorunnaassaaq.

Tamatuma suliffeqarfissuup MT Højgaardip ingerlatsinermut angusai 73 millionit koruuninut appartippai. Ukiup siulianik ingerlatsinermut sinneqartoorutaasoq 372 millionit koruuniugaluarpoq.

2016-ip ingerlanerani suliffeqarfissuup sulisui inissianik, ikaartarfinnik atuarfinnillu suliaqarput.

Naak naatsorsuutit inerneri naatsorsuutigisamit ungasikkaluartut pisortap 2017 neriulluarfigaa.

/ritzau/

Powered by Labrador CMS