Ilisimatusarnikkut suliniutit arfineq-pingasut Nunatsinni Ilisimatusarnermut Siunnersuisoqatigiinnit katillugit 1,2 millionit koruuninik aningaasaliiffigineqarput.

Siunnersuisoqatigiit tusagassiuutinut nalunaarummi taama ilisimatitsipput.

Ilisimatusarnerup siuarsarnissaanut aningaasaliissutit ilaatigut issittup saarulliisa qalipaataasa assigiinngitsut isumaat, nukittussutsit isiginiarlugit imminut toqunnissamut pinaveersaartitsinermut aammalu qanoq ilillutik inuussutissat kulstofillu nunamit kangerlummut kuugussaasut silaannaap pissusaata allanngoriartorneranut tunngatillugu imaani uumassusillit ataqatigiiaarnerannut siulittuutigisinnaaneranut iluaqutaasinnaanerat ilisimatusarfiginerinut atorneqassapput.

- Ilisimatusarfissat pitsaasuusut inuiaqatigiit pillugit paasititsissapput siunissamullu piareersimatissalluta, Nunatsinni Ilisimatusarnermik Siunnersuisoqatigiit siulittaasuat, Josephine Nymand oqarpoq.

Nangippoq:

- Taamaammat ukioq manna Ilisimatusarnermut siuarsaanermi aningaasaliissutit saqqummiunneri immikkuullarissuuvoq, ilisimatusarfiginiarlugit qinnutigineqartut Kalaallit Nunaanni inuiaqatigiinni unammilligassanut iluaqutaasinnaasut amerlammata.

Ataasiinnarmik eqqarsannginnissaq

Siulittaasup oqarnera naapertorlugu Nunatsinni Ilisimatusarnermik Siunnersuisoqatigiit nunatsinni ilisimatusarnerup nunami najugaqartut kissaatigisaanninngaanneernissaannut ilisimatusagassatullu pingaarnersiorneqarnissaannut annertuumik suliaqarput.

- Taamammat suliniutit inuiaqatigiinnut, ileqqorissaarnermut, piginnaanertusarnermut minnerunngitsumillu sumiiffinni suleqateqarlunilu najuunnissamut annertuunik piumasaqaateqarpugut.

- Aningasaliinerit annertunerumaat pingasuususut tamarmik immikkut 250.000 kr-it tungaanut aningaasaliiffigisinnaagatsigit iluarisimaarutigaarput, taakkulu suliffeqarfiit assigiinngitsut suleqatigiinnerisigut ingerlanneqassapput.

Suliniutinut qinnuteqaatit suliffeqarfiit akimorlugit suleqataaffigineqarnissaat piumasaqataatigitillugit ilisimatusarnermik aningaasaliisutut suleqatigiisitsineq, sunneeqatigiinnerusinnaaneq ataasiinnarmillu eqqarsannginnissaq qulakkeernerusinnaallugut, siulittaasoq isumaqarpoq.

Suliniutit tamarmiusut pillugit UANI atuarsinnaavatit.