ileqqorluttarneq
Nunatsinni ileqqorlunneq siullerpaamik misissorneqassaaq
Transparency Greenland nunat tamat kattuffiannut immikkoortortaqarfittut ilaasortanngungajalerpoq. Tassungalu atatillugu nuna tamakkerlugu misissuisoqassaaq
'Anngiortumik pinerlunniartarneq tassaavoq imminut iluanaartinniarluni pisortatut/pisortaqarfittut tatigineqarluni oqartussaaffigisanik atornerluineq.'
Nunatsinni Transparencyp maanna siullerpaamik misissuiffigisassani taama oqaasertalerpaa, nunat Transparencymut ilaasortaasut soorlu aamma akulikitsukkaartumik misissorneqartartut.
Nunarput ilaalissaaq
Decemberip qaammataani matumani siullermeersumik misissuisoqassaaq paasiumallugu innuttaasut pinerlunniartarneq qanoq isumaqarfigineraat qanorlu ilisimasaqarfigineraat.
Atuaruk: Transparencyp nunatsinni immikkoortoqarfia qaffatsinneqarpoq
Taamatut iliorneq aqqutigalugu Kalaallit Nunaat 2016-imipinerlunneq pillugu nalunaarsuisarfimmi Global Corruption Barometerimi nunarsuaq tamakkerlugu akuersaagaasumi ilaalissaaq.
Nunatsinni Transparencyp nunat tamat kattuffiani ilaasortap nutaajusup neriuutigaa, misissuinermut atatillugu sianerfigineqartut tikilluaqqusilluarlutik piffissamik atuilaarumaartut apeqqutit unneqqarissumik akinissaannut.
Aappaagu saqqummiunneqassasoq
Misissuineq siunissami pineqartup iluani ineriartornerup siaruartorneranik kinguariartorneranilluunniiit uuttuisinnaalernissamut tunngaviliissaaq.
- Transparency International Greenlandimit qilanaaraarput inernerit saqqummiunnissaat, peqatigiiffiup siulittaasuaq, Anita Hoffer oqarpoq.
- Akimummi ersittumik suleriaaseqarneq pinerlunnaveersaartitsiniarnissami qitiulluinnarlunilupingaaruteqarluinnartuuvoq, taamaattumillu inuiaqatigiinni ingerlatsinerup akimut ersittumik ingerlanneqarnissaa siunertaavoq, tamannalu anguniarparput pinerlunniarsinnaanermi navialiffiusinnaasut ilisimatitsitsissutigisarnerisigut.
FN ullumikkut ullorititaqarpoq
Ullumikkut ulloq FN-ip pinerlunnaveersaartitsinermut ullorititaraa.
Nunatsinnilu Transparencyp aamma tamanna malunnartinniarpaa, pinerlunnaveersaartitsinissaq pillugu quppersagaq 2014-15-mi Nunatsinni pissutsinut tulluarsarlugu allanneqarsimasoq nutartigaq saqqummersillugu.
Nunatsinni maluginiarneqalertoq
Quppersagaliaq suleqatigiissunut suliffeqarfinnullu sakkussatut atugassiaavoq. Assersuusiat atorlugit pinerlunniarfiusinnaasutut navialiffiusinnaasut oqallissaarutigineqarlutillu.
- Kalaallit Nunaanni amerliartortut pinerlunniartarneq maluginiarneruleriartoraat Transparencymit maluginiarneqarpoq. Amerliartuinnartullu pinerlunniartarneq akueriumajunnaaraluttuinnaraat. Ullorlu manna atorneqarsinnaavoq akuersaarinnikkumannginnermik ersertsitsinissamut, siulittaasoq erseqqissaavoq.