Nunatsinni futsalertarnerup ineriartortinneqarnissaa kattuffimmit anguniarneqarpoq
Sapaatip akunnera una aallarnerfigalugu René Olsen aamma Bent Petersen futsalimi ilinniartitsinermi inerisaasussatut atorfinitsinneqarput
- Sungiusaanerit iluini ataqatigiinnerusumik iliuuseqarutta Futsalimi anguneqarsinnaasut suli qaffasinnerulissapput, tassanilu annertuumik suliassaqartugut takusinnaavarput – nunatsinnilu sineriak tamakkerlugu klubbini inerisaanissat peqataaffigissavarput.
Kalaallit Arsaattartut Kattuffianit atorfinitsinneqartoq René Olsen, kattuffiup nittartagaanut, oqarpoq.
Internetsikkut aallerfiusinnaasoq
Immikkoortortaqarfimmi suliassat siulliit marluusut ilagaat målmandinik sungiusaanermut pikkorissaanerup aaqqissuunneqarnissaa kiisalu klubbit ilinniarnissaminnut aallerfigisinnaasaannik nittartakkakkut aaqqissuussisoqassaaq, taannalu aqqutigalugu sungiusaasoq futsalimi tunngaviusumik sungusaanissaminut sakkussarsiorsinnaanngussalluni soorlu futsalimi teoriit, sungiusaanerit, videoliat assigisaallu – taakkualu tamarmik kalaallisut aamma pissarsiarineqarsinnaassapput.
- Nunat mikinerusut iluanni ilinniarnerup iluani aallussilluartoqarsimaneratigut angusarissaartoqarsimasoq takusinnaavarput, uagullu inukitsunnguamiikkatta taamaattumik ineriartorluassagutta ilisimasasarsiorluartariaqarpugut, René Olsen oqarpoq.
Ineriartorneq pissanganartoq
René Olsenip Bent Petersenillu atorfinitsinneqarnerat KAK-mi siulittaasumit John Thorsenimit nuannaarutigineqarpoq.
- Angusaqarusussuserput aaliangiinerpaassaaq, tassami angusinnaasarpassuaqarpugut, sakkussaniguna amigaateqaannartugut. Maannamullu ilinniartitsinissamut periusissiarput inerisassavarput. Klubberpassuarni aallussilluartoqarput, taakkualu ineriartortisinissanut tapersersorneqarnissaminnullu kattuffik pisariaqartilluinnarpaat.
- Ineriartornissatsinnut pissangaqaagut neriuppugullu klubbit sungiusaasullu suliniutiginiakkagut tigulluarumaaraat, John Thorsen oqarpoq.