Filmi Inuit
Nunatsinni filmiliatoqaq USA-mi takutinneqassaaq
Filmi sapaatip akunnerani tullermi New Yorkimi takutinneqareerpat Kalaallit Nunaat pillugu oqallittoqassaaq
Jette Bangip filmiliaa 1938-imeersoq ´Inuit´ sapaatip akunnerani tullermi New Yorkimi Scandinavian Housemi takutinneqassaaq, tassanilu oqaluttuarineqarpoq Qimusseriarsuarmit Avannaani Cape Yorkimut angalaneq.
Filmip takutinneqarnerata kingorna Københavnimi Kalaallit Illuutaata pisortaata Leise Johnsenip Jette Bangip suliai aammalu Kalaallit Nunaata ineriartornera oqallisigitissavai.
Taamatut Kalaallit Illuutaat tusagassiorfinnut nalunaarutikkut paasissutissiivoq.
Oqaluttuarisaanerup ilaa pingaarutilik
Filmi arlalitsigut nalissaqanngitsuuvoq, ilaatigut pissutigalugu Kalaallit Nunaanni filmiliat qalipaatillit siullersarimmagu, pingaartumilli inooriaatsimik imaannaanngitsumik takutitsimmat, qangatut atisanik amernik, tupernik amernik umianillu, ukiualunnguit tamatuma kingorna tammarsimasunik.
– Jette Bangip assinik katersai kusanarluinnartut Kalaallit Nunaata oqaluttuassartaata ilaanik pingaarutilimmik oqaluttuarnissamut matuersaataapput nalissaqanngitsut. Tamatigut nuannertaqaaq taassuma isiginninnera atorlugu taamatut siammarsaasarneq, Leise Johansen tusagassiorfinnut nalunaarutikkut oqarpoq.
New Yorkimi Scancinavian House nunat avannarliit kulturikkut illorsuaraat, tassanilu pisarput saqqummersitsinerit, filminik takutitsinerit, tusarnaartitsinerit, meeqqanut sammisaqartitsinerit allarpassuillu, nunanit avannarlernit aallaavillit. Filmi Inuit oktobarip 26-anni takutinneqassaaq.