Nunatsinni corona misissuiffigineqassasoq
Covid-19-ip nunami atugaanera nunamullu sunniuteqarnera misissuiffigineqassaaq. Nakorsaq ph.d-nngorniartorlu Mie Vilstrup Møller tassaavoq tuniluuttoqarpiannginneranik aamma tuniluuttoqarsimasuuppat qanoq pisoqarsimasinnaaneranik misissuiniartoq.
Coronap nunarsuarmi tuniluutilerneraniit ukioq ataaseq qaangiussimalersoq, nakorsap ph.d-nngorniartullu Mie Vilstrup Møllerip nunami maani tuniluunnerup qanoq ingerlarsimanera qulaajaaffiginiarpaa. Tassa tuniluunnerup sunniutigisimasai sisamat assigiinngitsut misissuiffiginerisigut.
Covid-19 nunarsuarmi tamarmi anersaartorfitsigut nappaatinut allanut sunniuteqartarsimavoq. Qanermut assiaquteqaqqusaaneq allanullu qanillinaveersaaqqusaaneq coronap nalaani anersaartorfitsigut nappaatit atugaannginnerusimanerannut pissutaasimasinnaapput.
Mie Vilstrup Møllerip nunanit allanisuulli sakkortutigisunik killilersuisimanngikkaluarluta nunami maani misissorniagaasa tamanna ilagaat.
- Ulluinnarni Dronning Ingridip Napparsimmavissuata nakorsaatitortunut uninngavianni sulisarpunga, tassani malugisinnaasimavarput coronap nalaani anersaartorfitsigut nappaateqalersartut ikinneerarsuanngorsimasut, nakorsaq oqaluttuarpoq.
Kalaallit Nunaanni coronavirusimut atatillugu toqusoqarsimanngilaq, ikittuinnaallu nunami maani tunillatsissimallutik.
Killilersuutit sukannersuusimanngitsuuppata susoqarsimassagaluarpa?
Tunillatsissimasut ikittunnguusimanerannut nunap matuneqapallassimanera, killilersuinerit, angalasunik misissuisarnerit innuttaasullu peqqissuutinniarlugit allatigut suliniuteqartarsimanerit pissutaapput. Taamaammat pingaaruteqarpoq, Kalaallit Nunaanni coronap atuussimanera pillugu nunami maani nunarsuullu sinnerani paasisaqarnissarput, Mie Vilstrup Møller oqarpoq.
Pissutsit katillugit sisamat misissorneqartussat tassaapput:
1. Akiuussutissap piffissap ingerlanerani sunniutai
2. Tikittunik misissuisarnerup sunniutai
3. Pissusilersuutinik allannguisimanerit anersaartorfitsigut nappaateqalersarnerit ikilisimanerannut sunniuteqarsimappat?
4. Ajornerpaamik pisoqarsimasuuppat susoqarsimassagaluarpa
- Coronap tuniluunnerani Kalaallit Nunaata sooq immikkuullarissuseqarsimanerata takussutisssaqartinneqarnissaa pingaaruteqarpoq. Tuniluunneq taamak annikitsigisinnaatillugu qanoruna iliuuseqarsimasugut. Ilisimatusarneq aamma nunarsuarmi nutaamik tuniluuttoqalissagaluarpat Nunatsinnut illersuutaasinnaavoq, nunarsuullu sinnerani immaqa ilinniutaasinnaallunit.
Ilisimatusartup takussutissanik misissuinermigut aamma nalilerniarpai, tuniluunnerup Nunatsinni qanoq ingerlasimasinnaanera aamma suliffeqarfinni, atuarfinni sunngiffimmilu sammisaqartarnermi killilersuutaasimasut qanoq sunniuteqarsimaneri.
Killilersuutit sukannersuusimanngippata imaluunniit issittumi nunat allat assigalugit killilersuinerit annikinnerusimasuuppata tamanna qanoq kinguneqarsimassagaluarpa? Nunatta tamanna ukiut tulliuttut pingasut ingerlaneranni akissutissarsissavaa, Mie Vilstrup Møller oqaluttuarpoq.