Nunatsinni arsartartoq Savalimmiuni arsartartunngortoq

Rene Eriksen Petersen Nuummi B-67 qimakkallarlugu Savalimmiuni KÌ Klaksvikimi arsartartunngorpoq. Klaksvikimi 1. divisionimi arsartartunngornissani siunniuppaa.

Savalimmiuni Klaksvikimi ulluni 14-ini sungiusaqataaneq, Rene Eriksen Petersenimut akilerluarpoq.

Klaksvikimi 2. divisionimi arsartartussatut maanna isumaqatigiissuteqarpoq, Savalimmiunullu marlunngormat nuuppoq.

Nuummi B-67 qimakkallarlugu Klaksvikimi silami arsartarneq aalluttussanngorpaa.

- Arsartarneq nunatsinnut sanilliullugu qaffasinneruvoq. Malugisinnaavara silami arsartarneq ukioq kaajallallugu maani ingerlassinnaagaat. Nunatsinni silami arsartarneq ineriartortittariaqarparput, taamaattumik maani arsartalernera periarfissatsialaavoq, ineriartortitsisariaqaratta, 21-nik ukiulik Rene Eriksen Petersen oqarpoq.

Rene Eriksen Petersen suli aalajaginngilaq qanoq sivisutingisumik Savalimmiuniissanerluni. Nuunnerani unammillernarnerpaasussaq tassaanerarpaa ilaquttani nunanilu qimallugit nuunneq, arsarnerli misilittagaqalernissarlu aallukkusuppai.

Piginnaasani misilittarai

Klaksvik II-mi 2. divisionimi arsarluni aallartissaaq. Klaksvikimili 1. divisionimi arsartalernissani siunniuppaa.

- Arsaqatissama tikilluaqqulluarpaannga, iluarsisassaqartillungalu oqarfigiuarlunga. Arsarneq aallutiinnarukku aappaagu imaluunniit kingusinnerpaamik ukiut marluk qaangiuppata Klaksvikimi 1. divisionimi arsartalersinnaanera angusinnaasorivara, Rene Eriksen Petersen oqarpoq.

Nunanut allanut unammisartoq Bastian Rosing Savalimmiuni sungiusaqataareerluni nunatsinnut uteqqikkallarpoq, ajoqusersimanini qaangerniarlugu sungiusaqqaassagami.

Powered by Labrador CMS