takutitassiaq
Nunatsinni arsaattartut pillugit aallakaatitassiaq nunarsuarmioqatitsinnit takuneqarsinnaasoq
Silami arsaattarnerup sivikitsuaraasarnera, arsaattarfinnik pitsaasunik peqannginnera unamminiarnerillu erloqinarsinnaasarneri pillugit aallakaatitassiamik saqqummiisoqartoq
Kalaallit Nunaanni arsaattartut pillugit aallakaatitassiaq minutsini arfineq marlunni Fifa Futbol Mundial aallakkaatitassiaa nunani amerlasuuni aallakaatinneqarpoq.
Aallakaatitaq nunani assigiinngitsuni 140-ni takutinneqarpoq, tassani Nunatsinni arsaattarneq pillugu unammillernartut takuneqarsinnaallutik.
Air Greenland aningaasaliissuteqatigalugu taassuminnga suliaqaqataasoq Visit Greenland nalunaarpoq.
Aallakaatitami GBU-mi siulittaasoq John Thorsen apersorneqarpoq, tassani arsaannerup qanoq inissisimanera oqaluuserineqarlunilu siunissami takorluukkanik saqqummiisoqarluni. Silami arsaattarnerup sivikitsuaraasarnera, arsaattarfinnik pitsaasunik peqannginnera illoqarfiillu unamminiarneri erloqinarsinnaasarneri isiginnaartut aamma takusinnaavaat.
- Tassunga aallakaatitamut aningaasaliinerput nalinginnaanngitsuuvoq, Visit Greenlandimi siunnersorti Malik Milfeldt nassuiaavoq.
- Kalaallit Nunaat kisimi pinngortitaa alutornartuunanilu innuttaasui pissanganartuunngillat, isiginnaartunut tamanna aallakaatitassiortut takutippaat. Timmisartuutileqatigiit suleqatigalugit aallakaatitassiortut pitsaasumik sullippagut akunnittarfimmi najugaqartillugit, suliassatillu kisimik suliarissagaat oqarfigalugit, Malik Milfeldt tusagassiutinut nalunaarummi oqarpoq.
Meeqqat arsaattut
Aallakaatitami Visit Greenlandip immiussimasaanik imaqarluarpoq naggataanilu meeqqat Nuummi Atuarfik Ukaliusap eqqaani isikkamik arsaattut takutinneqarlutik. Aallakaatitaq septembarimi suliarineqarpoq.
Isikkamik arsaalluni GM-ertoqarnerani ajoraluartumik assinik takutitsisoqanngilaq.