Nunatsinni angerlartiinnarneqartartut - Damnarkimi unitsitaasut
Piffissap sivikitsup ingerlanerani anaanat pingasut meeqqatik amerluuteqartut ilagalugit Danmarkiliarlutik Hvidovre Hospitalimut saaffiginnittarput. Meeqqat marluk erngerlugit napparsimmavimmut unitsinneqarput.
Amerlunnerni ikit ammaannartut, amermi qalippernerit annertuut, nerisassanik sapigaqarneq timillu annerpaartaani anillannerit.
Anaanat pingasut, Kalaallit Nunaanni najugaqartut, meeqqatik amerlunneri pillugit arlaleriarlutik nakorsiussisarsimapput, tarnutinillu assigiinngitsunik peqqinnissaqarfimmit tunisittarsimallutik. Iluaqutaanngitsumik. Anaanaasut pingasut, toqqaannartumik imminnut attuumassuteqanngikkaluarlutik Danmarkimut piffissap sivikitsup ingerlanerani Danmarkimut aallarput, meeqqatik namminneerlutik nakorsiunniarlugit.
Siulleq Danmarkimut aallarpoq aningaasaqarnikkut innuttaasunit arlalinnit ikiorneqareerluni. Angalaneq qaammat kingulleq pivoq.
Danmarkimi Laila Bertelsen aalajangerpoq anaanaasoq Hvidovre Hospitalimi meeqqat nakorsiartarfianut saaffiginnittoq ikiorniarlugu. Meeraq tassani, maanna ukiup affaa avillugu utoqqaassuseqartoq, misissorneqarpoq, ingerlaannartumillu unitsinneqarluni steroidillu atorlugit nakorsaaserneqarluni.
Tamassuma kingorna Laila Bertelsen arlalinnit saaffigineqartalerpoq, marlunnillu allanik maanna ikiugaqareersimalluni.
Annilaarujussuartoq
Piffissap sivikitsup iluani meeqqat pingasut, tamarmik sisamat inorlugit ukiullit, Danmarkimi peqqinnissaqarfimmi nakorsaatinik sakkortuunik ikiorserneqarput, amerluutaalu sapigaallu pillugit misissungaritilerlutik.
- Hvidovre Hospitalimi meeqqanut immikkoortortaqarfimmi nakorsap ataatsip meeqqat siulliit marluk takoqqaarpai. Paasisakka malillugit nakorsaq annilaarujussuarpoq, piffissami sivikitsuinnaap ingerlanerani assigiimmik nappaatillit saaffiginnimmata, pinartumillu ikiorneqartariaqartut takusinnaagamigit, Laila Bertelsen oqaluttuarpoq.
Taassuma anaanat pingasuusut attaveqaataattut ikiuutissalluni aalajangersimavoq. Angajoqqaajusullu akuersinerisigut Danmarkimi nakorsiarneq pillugu oqaluttuarluni.
Laila Bertelsen nunatsinneersuuvoq, nakorsamut allatsitut ilinniagaqarluni maannalu Danmarkimi Brøndbymi najugaqarluni.
Nakorsaasiinerit annikippallaartut
Meeqqat nakorsiarnerini sapinngisani tamaat peqataaniartarpoq. Meeqqat nunatsinni illoqarfinni nunaqarfinnilu assigiinngitsuneersuupput, maannali tamarmik amerluutitik pillugit Danmarkimi misissorneqarlutillu nakorsarneqarput.
- Bispebjerg Hospitalimi ammit nakorsaannut ullut tamangajaasa attaveqarpunga, aammalu Hvidovre Hospitalimi meeqqanut immikkoortortaqarfik attaveqarfigalugu. Meeqqat pineqartut pingasut tamaasa pillugit nakorsat naliliipput amerluutaannut nakorsaasimanerit naammaginanngitsuusut, Laila Bertelsen oqaluttuarpoq.
Laila Bertelsen oqaluttuarpoq nunatsinniit aallaannarluni Hvidovre Hospitalimi nakorsiarniarneq maanna ajornarnerulertoq. Bispebjerg Hospitalimili ammit nakorsaqarfiani nakorsaanerit ataasinngorpat ataatsimeersuassapput, nunatsinni amerluuteqartut taama amerlatigisut piffissap sivikitsup ingerlanerinnaani tikissimanerat aaqqiissutissallu oqaluuserineqassallutik.
Sermitsiaq.AG-p peqqinnissaqarfimmi aqutsisut oqaaseqartinniarlugit sulivoq. Nutaarsiassaqartitsiviup Hvidovre Hospital aamma Bispebjerg Hospital ajornartorsiut pillugu aamma attaveqarfigissavai.