Nunatsinni akiuussutissalertinnerup saniatigut sunniutai: Niaqorlunneq, kissarneqarneq amerluuteqalernerlu

Nunatsinni Nakorsaaneqarfimmit nunami maani innuttaasut coronamut akuussutissalersorneqarneranni saniatigut sunniutinik nalunaarsuisimaneq pillugu nalunaarusiaq saqqummiunneqarsimavoq.

Akiuussutissalerneqarnermit saniatigut sunniutaasorisat matumani pineqarput, saniatigut sunniutit innuttaasunit nammineq maluginiarneqarsimasut nakorsanilli qulakkeerneqarsimanngitsut matumani pineqarlutik. Saniatigut sunniutit annikittunnguit peqqinnissaqarfimmi sulisunit nalunaarsorneqarsimapput.

Aamma nakkutigineqartunut sanillersuussisoqarsinnaasimanngilaq, taamaammallu saniatigut sunniutit akiuussutissalerneqarsimanermut attuumassuteqarnersut erseqqissumik oqaatigineqarsinnaanatik.

"Ilisimaneqartut, sakkukitsut ingasappallaanngitsullu"

Saniatigut sunniutit nalunaarutigineqarsimasut

Nalunaarusiaq naapertorlugu, Kalaallit Nunaanni innuttaasut 2021-mi decembarip 31-at ilanngullugu COVID-19-imut akiuussutissalersorneqarnerannit saniatigut sunniutit pillugit nalunaarutit 242-simapput, Kalaallillu Nunaanni Peqqinnissaqarfimmit Nunatsinni Nakorsaaneqarfimmut nalunaarutit 61-iusimallutik.

Pissarsiffik: "Indberetning af formodede bivirkninger efter vaccination mod COVID-19 2021"

Saniatigut sunniutaasorisat "ilisimaneqareersuusut, sakkukitsuusut ingasappallaanngitsullu":

- Akiuussutissalerneqarnermi ippigineqarnerpaasimasut tassaapput; kapitifffimmik ippigisaqarneq, niaqorlunneq, kissarneqarneq, nukitsigut naggussatigullu annerisaqarneq, timminneq, meriarneq aaqarnerullu allanngornera. Peqqinnissaqarfimmiilli nalunaarutigineqartuni amerluuteqalersimasut saniatigullu sunniutit ilungersunarnerusut nalunaarutigineqarsimapput.

Tabelimit tulliuttumi takuneqarsinnaapput, innuttaasut saniatigut sunniutit pillugit namminneq nalunaarutigisimasaat 241-t:

- Kalaallit Nunaanni akiuussutissalersuinermi saniatigut sunniutigineqartut nunarsuarmi nunanit allanit, tassunga ilanngullugu Danmarkimit allaaneruallaanngillat - tassa saniatigut sunniutit suuneri ukioqqortussuserlu eqqarsaatigalugit, nalunaarusiami allassimavoq.

Nalunaarusiamili immikkut maluginiarneqarsimavoq:

- Nunalli immikkoortuanit suminngaanneerneq suiaassuserlu eqqarsaatigalugit nalunaarutit assigiinngissuteqarput, nalunaarutigineqartu pingaartumik Nuummiit arnaniillu tiguneqarsimallutik, nalunaarusiami allassimavoq.

Tabelimi tulliuttumi nalunaarutit illoqarfinnit peqqissaavinniillu tiguneqarsimasut aggutaarnerat takuneqarsinnaavoq:

Innuttaasut arlallit iluaallersimasut ataaserlu qaratsami ameraasartaatigut aseruunneqalersimasoq pillugit nalunaaruteqartoqarsimavoq, pisimasulli taakku COVID-19-imut akiuussutissalerneqarsimanermut toqqaannartumik attuumassuteqanngitsut oqaatigineqarluni.

Innuttaasut 14-it akiuussutissalerneqarsimanermik kingunerluuteqarlutik napparsimmavimmut unitsinneqarsimasut peqqinnissaqarfimmit nalunaarutigineqarsimavoq.

Toqusut marluk

Toqusimasut marluk pillugit aamma nalunaaruteqartoqarsimavoq, nalunaarutigineqartup aappaa akiuussutissalerneqarnermi kingorna ullut 14-it ingerlaneranni toqukkut qimagussimalluni:

- Peqqinnissaqarfimmit toqusimasut marluk pillugit nalunaarutigineqartut, akiuussutissalerneqarsimanerat toqunerallu imminnut attuumassuteqanngitsut oqaatigineqarpoq. Nalilerneqarsimavoq toqunerannut alla pissutaanerusimasoq, nalunaarusiami allassimavoq.

Nalunaarusiaq tamakkerlugu uani atuarsinnaavat.