aalisarnermut inatsit

Nunatsinni Advokatit: Aalisarnermut inatsit amigarpoq

Peqatigiiffik Nunatsinni Advokatit, aalisarnermut inatsisissamut siunnersuummut sakkortuumik isornartorsiuipput, tamanna peqatigiiffiup tusarniaanermut akissutaani aalisarnermut piniarnermut naalakkersuisoqarfimmut nassiunneqarsimasumi takuneqarsinnaavoq.

Inatsit maanna iluseqartillugu akuerineqassappat, naalakkersuinermik suliaqartut tamatuma kingussai paasisinnaanngilluinnarpaat, inatsisilerituut taama isumaqarput.

Inatsit unitsinneqarli
Inatsisip allanngortinneqarnissaanut siunnersuutigineqartup maanna tunngavigineqartoq atorlugu akuerineqannginnissaa, inatsisilerituup Peter Schriverip peqatigiiffik sinnerlugu kaammattuutigaa.

Aalisarnermut inatsisip kingunissaanik misissueqqissaarnermik Nunatsinni Advokatit amigaateqarnera tunngavilersuutigaat.

- Inatsisissatut siunnersuutip aamma oqaaseqaatit misissornerisa takutippaat, inatsisissatut siunnersuutip kingunissai - ingammik aningaasaqarnermut tunngasut - erseqqissarneqanngilluinnartut. Siunnersuut qanoq kinguneqassanersoq ilisimaneqanngilaq, tamannalu inatsimmut oqaaseqaatini toqqaannartumik takuneqarsinnaavoq. Akerlianik aaqqiissutip kingunerisaanik inuiaqatigiinni annertuumik annaasaqartoqassaaq, naak annaasaqarnerit taamaattut qanoq annertutigisarnerat ilisimaneqanngikkaluartoq, tusarniaanermi akissuteqaammi Sermitsiaq.AG-p pissarsiarisimasaani tamanna allaqqavoq.

Inatsimmik suliaqarneq naammassinngitsoq
''Inatsimmik piareersaataasumik suliaqarnerni tamani ilaatigut pisortanut aamma inuussutissarsiornikkut aningaasaqarnikkut kingunissat pingaartorujussuusut, tassani inatsisiliortup aalajangiinissamut tunngavissaanik pisariaqartumik qulakkeerinnittoqartarmat'', Nunatsinni Advokatit oqaatigaat.

- Tamanna aamma Kalaallit Nunaanni nunanilu allani assersuuttakkatsinni suleriaasaavoq aalajangersimasoq – ilaatigut Danmarkimi – tassani kingunissat danskit ministeriaasa malitassaannik misissoqqissaarneqarnissaannut ilitsersuusiortoqarsimavoq, akissummi tamanna allaqqavoq.

Inatsit teknikkikkut misissorsimanagu peqatigiiffiup naqissuserpaa, aammalu tusarniaanermut atatillugu itinerusumik misissornissaanut periarfissaqarsimanngilaq.

Uillutik
- Siunnersuummi saqqummiunneqartoq inuussutissarsiutitta pingaarnersaannik allannguinissamik siunnersuuteqartoqarpoq, taamaammallu naalakkersuinermik suliaqartut akuersillutik imaluunniit akuersinatik aalajangiisussat kingunissaannik ilisimanninnissaat pingaartorujussuuvoq, taamaalillutik uillutik eqqorsorinerpaasartik aalajangiiffigisinnaassagamikku, Peter Schriver, tusarniaanermut akissuteqaammi allappoq.

Piniarnermut aalisarnermullu naalakkersuisoqarfiup tusarniaanermi akissutigineqartut suli saqqummiutinngilaat, qallunaatuunngorlugit imaluunniit kalaallisuunngorlugit nutseqqaarneqarnissaannik tamanna tunngaveqartinneqarpoq.

Powered by Labrador CMS