Nunat tamalaat filmfestivalerneranni Kalaallit Nunaat soqutigineqarluartoq
Europami filmfestivalit annersaanni, Berlinalenimi, Kalaallit Nunaannit ukioq manna peqataasoqaqqippoq. Peqataasullu ulapeqaat.
Kalaallit Nunaanni filmiliortartut Berlinimi filmfestivalertoqartarneranut peqataasarnerat ileqqunngorsimavoq. Ukioq manna arfineq-pingasunik peqataasoqarpoq, taakkulu ulapeqaat.
- Ukiuni arlalinni peqataasareerpunga, malugisinnaavaralu Kalaallit Nunaannik soqutiginnittut ukiumiit ukiumut amerliartortut. Mannakkulli immikkut erseqqissumik soqutiginnilersimapput, Nuummi Filmiliortarfimmi aqutsisoq Aká Hansen oqaluttuarpoq.
- Qujanartumik inuit Kalaallit Nunaannut tunngatillugu ilisimaqarneruleriartorput, aamma Donald Trump pissutaalluni, Aká Hansen oqarpoq.
Aamma filmiliornermi ingerlatsisup Nina Skydsbjergip soqutiginnilluartoqarnera malugisinnaavaa.
- Ataatsimiinnissat, oqallinnissat ilassinninnissallu arlallit peqataaffigisussaavakka, taanna oqaluttuarpoq.
Filmiliortartut peqatigiiffiani film.gl-imi siulittaasoq Klaus Georg Hansen ataatsimeeqataasaqattaarluni aamma ulapippoq. Film.gl filmfestivalimi aamma peqataavoq, ilaatigut kalaallit filmiliannik nittarsaassilluni.
- Suleqatigerusunneqaqaagut. Pingaartumik nunat inoqqaavinit allanit aamma filmiliortartunit, Aká Hansen oqaluttuarpoq.
Filmiliortarfik nunat tamalaat attaveqaataannut, Screen Talent Europemut ilaalersimavoq, taanna ullumi kingusinnerusukkut Nordiske Ambassaderimi Berlinimiittumi filminik takutitsissaaq. Inuusuttut filmiliornissamut piukkunnaatillit filmiliaat naatsut arlallit tassani takutinneqassapput. Filmiliornissamut piukkunnaatillit ilagaat Jens Christian Lybertht Lennert, Filmiortarfimmut attuumassutilik filmilu ‘Kukiiarneq’ takutinniarpaa.
Filmimik 'Pilluarneq Ersigiunnaarpara, Lykken skræmmer mig ikke længere'-mik ilitsersuisoq Nivi Pedersen workshoppimut Native Fellowsimut peqataassaaq.
