Nunat tamalaat ataatsimeersuarnissaat Kalaallit Nunaanni ingerlanneqassagunartoq

Arctic Circlep Reykjavikkimi allattoqarfiani pisortap Takeshi Kajip Sermitsiaq.AG-mut uppernarsarpaa, Arctic Circle Forumip Kalaallit Nunaanni ingerlanneqarsinnaanera oqaluuserineqartoq.

Ukiut tamaasa naalakkersuisunit, kattuffinnit, suliffeqarfinnit, universitetinit, isummersuisunit, avatangiisinik illersuiniaqatigiinnit, nunat inoqqaavinit soqutigisaqaqatigiinnillu allanit inuppassuit hunnorujulikkaat ukiumoortumik Reykjavikkimi Assembly pillugu ataatsimeersuartoqaraangat katersuuttarput.

Nunarsuarmi tamarmi oqallittarfiit

Arctic Circle Assembly ukiut tamaasa oktoberip arfineq-pingajuanniit aqqarnanut ingerlanneqartarpoq, tamatigullu Reykjavikkimi ingerlanneqartarluni. Tamtuma saniatigut Arctic Circlemi ”oqallittarfik” nunarsuarmi sumiiffinni assigiinngitsuni ingerlanneqartarpoq. Assersuutigalugu ”oqallittarfik” 2021-mi Abu Dhabimi ingerlanneqassasoq pilersaarutaareerpoq, tassani Himalaya – qalasersuit pingajuat sammineqassalluni.

Arctic Circle Kalaallit Nunaanni ataatsimeersuartitsissappat, Kalaallit Nunaat nunarsuarmit suli ukkatarineqarnerulissaaq, tassungalu peqatigitillugu peqataasorpassuit Air Greenlandimut, akunnittarfinnut neriniartarfinnullu aamma suliffeqarfinnut allanut isaatitseqataassapput. Tamatuma saniatigut nunanit tamalaani tusagassiorfitsigut saqqummiunneqartut takornariartitsinermut taamaallaat iluaqutaassapput.

Kalaalli Nunaat Grønland sammineqarluarsimasoq

Reykjavikkimi siorna Assembly pillugu ataatsimeersuartoqarmat Kalaallit Nunaat oqaluuserineqarluarpoq, taamatullu oqaluuserinninnerup inuppassuit Kalaallit Nunaanni pissutsinik paasisaqarnerorusutsilersimavai. Naalakkersuisut Siulittaasuat Kim Kielsen taamani ammaanersiorlugni oqalugiarpoq.

Pisortap Takeshi Kajip Sermitsiaq.AG-mut ilisimatitsissutigaa, ataatsimeersuarnermi atugassarititaasut ataatsimeersuarnerullu imassai pillugit Namminersorlutik Oqartussat Arctic Circlemit oqaloqatigineqartut.

Arctic Circle pillugu paasisaqarnerugit