Nunat tamalaat akornannut tunngassutillit ataatsimiinnermi sammineqarput
Statsminister Mette Frederiksen, lagmand Bárður á Steig Nielsen aamma Naalakkersuisut siulittaasuat Kim Kielsen ullumi marlunngornermi Statsministeriami ataatsimeeqatigiipput.
- Ataatsimeeqatigiinnerput ammasuullunilu pitsaasumik ingerlavoq. Nunatta Issittumi Atlantikullu Avannaani qitiusumik inissisimaffeqarnera, ukiunilu makkunani naalagaaffiit pissaanilissuit nunanut allanut tunngassutilinni ingerlatsinerat pissutigalugu avaqqunneqarsinnaajunnaariartuinnarnerput eqqumaffigaarput.
Statsminister Mette Frederiksen aamma lagmand Bárður á Steig Nielsen ataatsimeeqatigereerlugit Naalakkersuisut siulittaasuat Kim Kielsen tusagassiutinut nalunaarummi oqarpoq. Taakku Københavnimi Statsministeriami ullumi marlunngornermi ataatsimeeqatigiipput.
- Naalagaaffeqatigiinnerup iluani Kalaallit Nunaat Issittorlu pillugit apeqqutinut aalajangigassanullu piviusumik avaqqunneqarsinnaanngitsumillu Naalakkersuisut inissisimaffeqarnissaat pingaaruteqarluinnartuuvoq, Kim Kielsen oqarpoq.
Statsminister Mette Frederiksen ataatsimiinnerup kingorna ima oqaaseqarpoq:
- Issittup Atlantikullu Avannaata nunat tamalaat akornannit soqutigineqariartuinnarnera pissutigalugu naalagaaffeqatigiinnerup iluani suleqatigiinnerput nutaamik isumaqalersimavoq. Nunarsuarmioqatigiillu soqutiginninnerulersimanerat pissutigalugu oqaloqatigiittarnerput annertusartariaqarparput aammalu pitsaanerusumik Danmarkip, Savalimmiut Kalaallillu Nunaata akornatsinni siusinnerusumit suli pitsaanerusumik suleqatigeeriaaseqartariaqarpugut. Tamakku pissutigalugit ullumi ataatsimiikkatta nunanut allanut, Naalagaaffimmilu isumannaallisaanissamut illersorneqarnissamullu politikimut tunngassutillit eqqartorpagut.