Nunat pingasut aalisarneq pillugu isumaqatigiissuteqarfigineqartut

Kalaallit Nunaat ukioq manna aalisarnissaq pillugu Norgemik, Ruslandimik Savalimmiunillu isumaqatigiissuteqarsimavoq. Pingaartumik Savalimmiut imartaanni aalisarnissamut tunngatillugu 2020-mi isumaqatigiissutigineqarsimasumut sanilliullugu allannguisoqarsimavoq.

Aalisarneq pillugu EU-mik isumaqatiginninniarnerup qanoq inerneqarnissaanik suli pissangasoqarnerani, Norge, Rusland Savalimmiullu aalisarneq pillugu Kalaallit Nunaannit isumaqatigiissuteqarfigineqarsimapput.

2020-mi isumaqatigiissut eqqarsaatigalugu Norgemut isumaqatigiissut allannguuteqanngilaq.

Ruslandimut isumaqatigiissut allannguiffigilaarneqarpoq, tassa Ruslandip Kitaani qaleralittassaasa 225 tonsinik ikilineqarnerisigut Tunumi qaleralittassai 325 tonsiniit 550 tonsinut amerlineqarput. Akerlianik Kalaallit Nunaat Ruslandip imartaani immikkut 75 tonsinik saarullittassinneqapoq, kullerinulli pisassiissutit 430 tonsiniit 329 tonsinut ikilineqarlutik.

Savalimmiunut isumaqatigiissut

Isumaqatigiissut allannguuteqarnerpaasoq tassaavoq Savalimmiunut isumaqatigiissut. Savalimmiut Tunumi saarullittassaat 1000 tonsinik qaffaaffigineqarput, taamaalilluni saarullittassaat katillutik 2.500 tonsinngortinneqarlutik. Akerlianik Kalaallit Nunaata ammassassuartassai atlanto-skandiskiusut marloriaatinngorlugit 3.200 tonsiniit 6.500 tonsinut qaffaaffigineqalutik. Aamma saarullernartassai 13.500 tonsiniit 14.700 tonsinut qaffanneqarput.

Aalisarnermut Naalakkersuisoqarfiup aalisarnermik inuussutissarsiuteqartut peqatigalugit tusagassiorfinnut nalunaaruteqarnermi erseqqissaatigaat, isumaqatigiissutit nunanut taakkununnga naleqartorujussuusut, illuatungeriit aalisariutaanni ukioq tamakkerlugu suliassaqarnissaq qulakkeerneqartussaammat.

- Savalimmiormiut nunallu tamalaat imartaanni aalisakkanik ikerinnarsiortunik Kalaallit Nunaat 2021-mut periarfissaqalissammat taasariaqarpoq, tamatumanimi kalaallit aalisariutaat ikerinnarsiorlutik aalisartartut pitsaanerusumik atugassaqartinneqalissammata, Namminersorlutik Oqartussat ilisimatitsipput.

Powered by Labrador CMS