Nunat avannarliit killiit ulluanni pinngortitaq kinaassuserlu eqqartorneqassapput
Sisamanngornermi Nunat Avannarliit Killiit ulloraat. Tamanna alunnartinniarlugu Kalaallit Nunaata, Savalimmiut Islangillu kulturikkut suleqatigiinnerat nukittorsarniarlugu ersarinnerulersinniarlugulu aaqqissuussisoqarpoq.
Nunani Avannarlerni Piorsarsimassutsikkut Attaveqaat, NAPA, Nunat Avannarliit Killiit ulluanni, sisamanngornermi 23. september aaqqissuussanut marlunnut qaaqqusivoq.
Meeqqat atuarfiini angajullerni ilinniartitsisut ualikkut ataatsimeersuartinneqassapput, tassani nunat avannarliit killiit oqaasii, kulturikkut kiisalu oqaluttuarisaanermi ataqatigiinnerit sammineqassapput.
Ataatsimeersuarnermi ilinniartitsissutit digitaliusut "Uagut tassa Nunat Avannarliit" aallaavigineqassapput.
- Ilinniartitsissutini atuartut namminneq kinaassutsiminnik aamma nunani avannarlerni killerni allani atuartut kinaassusaannik paasisaqarnerunissaat siunertaavoq, NAPA-p pisortaa Anne Mette Gangsøy tusagassiorfinnut nalunaarummi oqarpoq.
Ataatsimeersuarnermi oqalugiartoqarluni, isiginnaagassiaaqqanik takutitsisoqarluni eqimattakkaarlunilu suleqatigiittoqartassaaq.
Pinngortitaq illoqarfissuillu
Kikkunnut tamanut ammasumik aaqqissuussaq Nuummi Katuami ualikkut nalunaaqutaq 18.00 aallartissaaq. Tassani oqaluttuartussat arlallit pinngortitaq pillugu misigisartakkaminnik oqaluttuassapput.
Ilaatigut nunatsinni tuttunniarnerup oqaluttuassartaa taassumunngalu tunngasuni ileqqut pillugit, Ilisimatusarfimmi kandidatinngorniartoq Angutinnguaq Olsen saqqummiissaaq.
- Pinngortitap Reykjavikimi, Tórshavnimi Nuummilu ulluinnarni inuunerput sunniiviginerusarpaa, Nunani Avannarlerni illoqarfissuarnut allanut Stockholmimut, Københavnimut Oslomullu naleqqiutissagaanni, NAPA tusagassiorfinnut nalunaaruteqarluni allappoq.
Aaqqissuussami nipilersoqatigiit akunniliisassapput.
Ullormi pisussat pillugit nassuiaatit NAPA-p nittartagaani atuarsinnaavatit.