siunnersuisoqatigiit
Nunat Avannarliit Killiit niueqatigiinnermut isumaqatigiissuteqalersut
Nunanut allanut tunngasunut naalakkersuisut Islandimit, Savalimmiunit aamma Nunatsinnit, nunat akornanni killilersugaanngitsumik niueqatigiinneq annertusissasoq isumaqatigiissutigaat.
Maannakkullu Nunat Avannarliit Killiit killilersugaanngitsumik isumaqatigiissusiornissaannik aamma taakku siunnersuisoqatigiissaannik pilersitsiniarluni allartittoqassaaq.
Isumaqatigiissut atsiorneqassaaq
Ullumi nunanut allanut tunngasunut naalakkersuisut pingasut, Nunat Avannarliit Killiit Siunnersuisoqatigiivisa ukiumoortumik ataatsimiinneranni, suleqatigiinnermut isumaqatigiissummik atsioqatigiissapput. Kingorna suleqatigiissitat pilersinneqarnissaat pilersaarutaavoq, taakkulu nunat akornanni suleqatigiinnerup annertusinissaanut periarfissanik ujartuisussanngortinneqassallutik, Reykjavikimi Nunat Avannarliit Killiit Siunnersuisoqatigiivinit tusagassiuutinut nalunaarummi atuarneqarsinnaavoq.
Nunanut allanut tunngasunut naalakkersuisut nunat pingasut akornanni suleqatigiinneq ukiut tamaasa oqallisigalugulu nalilersortarnissaat aamma isumaqatigiissutigineqarpoq.
Nunatsinnit naalakkersuisoq Erik Jensen peqataavoq, taassuma nunanut allanut tunngasunut suliassaqarfik Suka K. Frederiksenimit, napparsimalluni sulinngiffeqarallartumik tigummigallarpaa.
Innersuussutit
Nunat Avannarliit Killiit Siunnersuisoqatigiivisa suleqatigiinnissamut isumaqatigiissutissaq iluaraat, tamanna siunnersuisoqatigiit 2012-2015-imi inerniliussaannut naapertuuppoq, tassani Issittumi, killilersugaanngitsumik niueqatigiinnermut, angallannermut attaveqaqatigiinnermullu suleqatigiinnissamut ukkatarinninnerunissat taakkartorneqarlutik.
Ukiumut ataatsimeeqatigiinneq tallimanngornermi naammassissaaq.