Nuuk

Nunat avannarlerni kulturimik festivalernermik aaqqissuussinerit arlalissuit

Eqqumiitsuliortut 100-t, sammisaqartitsinerit 40-t scenellu arfineq-marluk atorneqassapput, Nuuk Nordisk Kulturfestival 2015 qaammammi matumani ingerlanneqarpat

Akisuanerit, Festival, 2014, Katuaq
Nuuk Nordisk Kulturfestivalimi misigisassarpassuaqassaaq. Assi Akisuanerit Festivalimit

Tusarnaartitsinerit, atuakkialerineq, isiginnaartitsinerit qitimmillu takutitsinerit, isumasioqatigiinnerit allarpassuillu misigineqarsinnaapput nunani avannarlerni kulturikkut pisitsinissarsuaq, Nuuk Nordisk Kulturfestival ingerlanneqarpat.

Saavalimmiunit Teitur, svenskeq Loney Dear, kalaaleq Nina Kreutzmann Jørgensen, islandimi8u Thorsteinn Tagnarsson nunanilu avannarlerni qitittartoqatigiit Panta Rei - tassa isiginnaartut qilanaarisinnaasaasa ilamininngui.

Taamatut tusagassiorfinnut nalunaarutikkut allappoq Kalaallit Nunaanni Nunani Avannarlerni Piorsarsimassutsikkut Attaveqaat, Napa.

Kulturi nutaamik sammillugu

Nuuk Nordisk Festivalimi pineqarpoq kulturip allaanerusumik misigineqarnissaa. Festivalimut atatillugu isumasioqatigiinnissat (workshop) arlalissuit pilersaarutigineqarput, eqqumiitsuliortullu arlallit isiginnaartut silarsuarminnut qanimut takutinniarpaat.

– Kulturip qangatut sammineqarnera nikisinniarsarpaarput, isiginnaartut iliuuseqaqatrigiissillugit, paasisassarsiortillugit namminnerlu kulturimut peqataatillugit, festivalimik aqutsisoqatigiit oqarput.

Suleqatigiinneq

Eqqumuutsiliortut nunanit avannarlerneersut kalaallillu qanimut suleqatigiinnerisa saniatigut kulturikkut festivali tassaalersimavoq kalaallit kulturikkut ingerlatsiviisa, kattuffiisa, peqatigiiffiisa inuussutissarsiortuisalu qanimut suleqatigiiffigilersimasaat.

– Illoqarfik tamarmi atorneqassaaq, aaqqissuussallu amerlanerpaartaat tamanut akeqassanngillat, taamaattumik inuit kajumissaarpavut meeqqanut, inuusuttunut inersimasunullu sammisassarpassuarnut takuniaasaqqullugit, Nuuk Nordisk Kulturfestivalimik suliniuteqarnermi pisortaq Mette Hein oqarpoq.

Festivali oktobarip 21-anni kulturip illorsuani Katuami ammarnersiorneqassaaq, tassani ilaatigut kalaallit nipiersoqatigiit Nanook unnuup ingerlanerani tusarnaartitsissallutik. Feativali naassaaq oktobarip 25-anni.

Powered by Labrador CMS