- Sukkulluunniit nunassittutut misigisimasimanngilanga.

Kirsten – Kisser – Lauridsen iggiarlungajattumik illarpoq. Illajanera isillu tungujortut qungujulasut Nuussuarmi angerlarsimaffiani apersornerani uteqqiattuarput. Oqaatsillu erseqqissarusutani nerrivik akuttunngitsunik patiallallugu erseqqissartarpai.

Aviisi AG allappoq.

Kisser AG-p qallunaani arnani nunassittuni apersorsimasaani manna tikillugu sivisunerpaamik Kalaallit Nunaanniissimasuuvoq.

- Avataanit qiviarlugu taamaattuunera ilumoorpoq, nunassittutulli misigisimasimanngilanga. Ullormit siullermilli angerlarsimasutut misigivunga, Kisser Lauridsen oqarpoq.

- Tamanna Sjællandip qeqqani illoqarfeerannguamit immamut qaqqanullu
isikkiveqanngitsumeeraanni sumik patsiseqarpa?

- Nuulluartartuugunarpunga. Aqqusaaginnartutut taaneqarsinnaasunut sanilliullunga
alianaarsarniarnerusarunarpunga, Kisser Lauridsen, inimi isikkivimminit Sermitsiaq
isiginnaassallugu nuannarisalik oqarpoq.

Nuulli ilisarnaataa qaqissallugu takorloorsinnaanngilaa, Quassussuulluunniit qaava
qaqinikuunngilaa:

- Aatsaat sikuerniarfimmik tappavunga oqqussisoqarpat tappavunnarumaarpunga, illarluni oqarpoq.

Arlaannik pisoqartariaqartoq

Pinngortitaq pivallaarnagu, Kalaalilli Nunaata inui Kisser Lauridsenimut pingaarnersaapput.

Ukiut untritillit affaani nunarsuarmi qeqertat annersaaniinnermini inupparpassuit naapissimavai. Maani inuusut aaqqusaaginnartullu. Kiisalu maanga imminermisulli nunassittut.

- Allat qanoq isigisarpaatsit – kalaaliuit?

- Naamik, taamak isigisarunanngilaannga. Ukiorpassuillu maanniissimanera kikkunnillu tamanik ilisarisimanninnera piinnarlugu nalukkiaanngilanga aamma. Inuit Brugsenimi naapikkaagakkit ima oqartarput: ”Suli maaniippit” illoqarfimmut ilaasutut isigigunarpaannga, Kisser 1953-mi inunngortoq oqarpoq.

Kisser pillugu oqaluttuaq tamaat aviisimi AG-mi sapaatip-akunnerani matumani saqqummersumi atuaruk, ugguuna iserfigisinnaavat.

AG Uge 25 2022

Klik her for at læse