pisimasut kinguneri
Nunasiaateqarneq suli atuuppoq
Gorm Wintherip ilaatigut Kalaallit Nunaanni pissaanermik atuinermik misissuisimasup ukiunilu arlalinni Ilisimatusarfimmi ilinniartitsisuusimasup Danmark tassanngalu tikisitat atuakkami nutaami appisaluuppai
Qallunaat naqqissuiumatunerat siumoortumillu isummereersimasarnerat Kalaallit Nunaanni ulluinnarni inuunermi ammip qalipaataanik immikkoortitsiniarnermut assinguvoq. Namminersorlutik Oqartussani ingerlatsiviinilu tikisitani »seqinnisaarianik« taaneqartartuni assersuutissaqarluarpoq.
Isummersuutit katersat
Taama aningaasaqarnermik ilisimasalik Gorm Winther ukiuni qulikkaani Kalaallit Nunaanni ajornartorsiutinik sammisaqareerluni ilaatigullu Ilisimatusarfimmi ilinniartitsisuusimalluni sakkortutigisumik eqikkaalluni naliliivoq.
Taamatut atuakkiamini nutaami »Dansker – luk døren forsigtigt efter dig« (Qallunaaq, sissuerlutit matu matujuk) isummersuutini katersani oqallissaarutaasumilu ilaatigut AG-mi saqqummersinneqartumi aallaqqaasiinermini oqarpoq. Tassani qallunaat inuussutissarsiorfinni sulisut soorlu Royal Greenlandimi pisortaasimasoq Kels Askær ilatsaasuisutut pasillerneqarpoq qallunaallu tikisitat atorfilittat inuiaqatigiinni akornusersuillutik miluuttuunerarlugit.
- Qallunaammi ajoqutaaginnarput. Ukiup affaata missaani suliassartik qanoq ingerlatissanerlugu kiisami paasigaangamikku angerlamut aallartarput.
Aalborgimi nuannaartut
- Sulisut taarsertarnerat annertoqaaq, umiarsuit containerersuutit timmisartullu qallunaat pequtaallu siumut utimullu ingerlattarpaat, tamannalu Aalborgermiut nuannaarutigiinnarsinnaavaat tassaniippormi Royal Arctic Linep Danmarkimut qilerutaa. Pisortaqarfinnullu annertoqisunut namminersorlutillu allaffissorumatuunut aningaasartuut amerlasuupilussuupput, Gorm Winther allappoq.
Atuagaq pillugu AG-mi atuaqqigit: