Nunarsuarmi ukioq kaajallallugu najugarineqartoq avannarpasinnerpaaq kiannerujussuani rekordiliivoq

Sumiiffik Alert, Qalasersuaq Avannarlermit 817 kilometerisut ungasissusilimmiittoq sapaatiummat 21 gradenik kiappoq. Aatsaat taama kiatsigaluni rekordiliivoq.

Nunarsuarmi sumiiffik ukioq kajaallallugu najugarineqartoq avannarpasinnerpaaq kiannerujussuani rekordiliivoq.

Sumiiffik Alert, Qalasersuaq Avannarlermit 817 kilometerisut ungasissusilimmiittoq sapaatiummat 21 gradenik kiappoq.

Rekordiuvoq, Canadami silasiortut nutaarsiassaqartitsivimmut AFP-mut marlunngormat taama nalunaaruteqarput.

- Nalunaarsuineq tamanna immikkuullarissuuvoq, silaannaallu kiatsikkiartornerata kingunerisaanit kiannerujussuarmi rekordiliinerpassuarnut aamma ilanngulluni, Armel Castellan, Canadami avatangiisinut ministeriaqarfimmi silasiortutut atorfeqartoq, oqarpoq.

62-it najugaqavissuupput

Alert Canadami Qikiqtaalummiippoq, innuttaasullu 62-iusut 2016-imi nalunaarsorneqarsimallutik. Canadamiut sakkutuui sumiiffimmi CFS Alertimik taallugu sakkutooqarfeqarput, taakku Ruslandip attaveqarnera pillugu paasissutissanik katersisarput paasiniaasartuullutillu.

Sakkutooqarfiup eqqaani 1950-imili aamma silasiorfeqalerpoq.

Rekordi kingulliusimasoq 20 gradenut uuttuunneqarsimavoq, 1956-imilu taama kiatsigisimalluni. Silasiorfilli 2012-ip kingorna arlaleriarluni 20 grademik uuttuisarsimavoq.

Alertimi juuli qaammat agguaqatigiissillugu 3,3 gradenik kiatsigisarpoq, nalinginnaasumik kiannerpaaffissaani 6,1 gradenik kiatsigisarluni.

- Issittumi kiarujussuartutut taassallugu ingasattajaarnerunngilaq, David Phillips, canadamiut naalakkersuisoqarfiani Environment and Climate Change Canada-mi silaannaap allanngoriartornera pillugu ilisimatusartoq oqarpoq.

Canadamiut naalakkersuisuisa naatsorsuutigaat aggustimi septembarimilu silaannap kiannerulissasoq.

Kalaallit Nunaanniit naqitsinertuffik

- Silap kiarujussuarneranut pissutaavoq naqitsinertuffik Kalaallit Nunaata nalaaniimmat. Taamaattoqartarnera qaqutigoorpoq kujataaniillu Det Arktiske Oceanimiit anorsaartitsilluni, Armel Castellan oqarpoq.

- Nunarsuarmi sumiiffinnut allanut sanilliullugu Issittoq pingasoriaammik sukkanerusumik kiatsikkiartorpoq. Tamassuma kingunerisaanik kulstoffinik aniatitsilluni mingutsitsineq annertuumik killilerneqartariaqaraluarpoq, Castellan oqarpoq.

Powered by Labrador CMS