Nunarsuarmi demokratiip ullua: Meeqqat atuartut qinerserrapput
Tallimanngornermi nunarsuaq tamakkerlugu demokratiip ullua Kommuneqarfik Sermersuumi nalliuttorsiutigineqarpoq inuusuttuaqqat qinersiartortillugit - inuusuttuaqqat 25-it inuusuttut kommunalbestyrelsianut qinigaassapput.
Ulloq 15. september 2023, demokratiip ulluani, Kommuneqarfik Sermersuumi inuusuttuaqqat kommunalbestyrelsiannut qinersisoqarpoq. Inuusuttuaqqat 25-it qinerneqassapput kommunip atuarfiinit 16-nineersut, taamak ilisimatitsivoq Kommuneqarfik Sermersooq nittartakkamini.
Qinersineq pereerpat, ilaasortassallu 25-it inuttalerneqareerpata, kingusinnerusukkut inuusuttut kommunalbestyresiannut ataatsimiigiaqqusaallutik aggersagaajumaarput.
Issiavinnut 25-nut sassartut 72-it
Assut soqutigineqarpoq inuusuttut kommunalbestyrelsiannut sassarnissaq. Tassami ukioq manna inuusuttuaqqat kommunip atuarfiini tamanit 72-it sassarput. Taakkunannga tassa 25-it tallimanngornerup ingerlanerani qinigaasutut suaarutigineqassapput.
Kommuneqarfik Sermersooq ilisimatitsivoq inuusuttut kommunalbestyrelseqarneranik siunertaavoq inuusuttut namminneq atukkaminnut, ilikkagassaminnut ineriartornissaminnullu tunngasunik isummatik oqariartuutigisarniassammatigit.
- Tamat oqartussaaqataaneranni suliaqartarnernut annertunerusumittaaq sunniuteqartassapput kommunimilu sulinermik soqutiginninnerat annertusarneqarluni. Ilaasortat innersuussutitik ataatsimoorullugit oqaaseqaasiarissavaat kommunalbestyrelsimullu ingerlateqqillugit tamatumalu kingorna siunnersuutit suliatulli allatut oqaluuserineqassapput.
Qineqqusaartut qineqqusaarutaat UANI atuarsinnaavatit.
