Nunarput VM-imut anngunniutsitsinissamut piareersarpoq

Timersoqatigiiffik Assammik Arsartartut Kattuffiat, TAAK-imi siulersuisut isumaqatigiittut aalajangerpaat assammik arsarluni pissartanngorniunnerit, Caribiamit, Amerika avannarlermit nunatsinniillu peqataaffigineqartussat, Nuummi aasamut ingerlanneqarnissaat sulissutigineqassasoq.

TAAK tusagassiorfinnut taama nalunaaruteqarpoq.

TAAK-imi siulittaasoq, Carsten Olsen Sermitsiaq.AG-mut ilisimatitsivoq nunatsinni pissartanngorniutsitsiutigaluni anngunniutsitsinissaq qulakkeerluinnalersoq.

- NACHC-mut (North America and the Caribbean Handball Confederation) pitsaalluinnartuuvoq, aamma oqaatsitigut ilisimatinneqareerpugut arnat assammik arsarlutik VM-imut anngunniunnissaat aasakkut 2023-mi ingerlanneqartussat nunatsinni ingerlanneqarsinnaasut, TAAK-ip siulittaasua Carsten Olsen Sermitsiaq.AG-mut oqarpoq.

Arnat nunanut allanut unammiartartut najukkaminni unammilersut

Ivaana Holm, arnat assammik arsartartut nunanut allanut unammisartuini aqutsisuusoq isumaqarpoq nunatsinni unammiffissami Cubamut, Mexicomut Amerikamulluunniit unammisinnaaneq ataqqinaataasoq annertooq:

- Takorluugaavoq piviusunngorsinnaasoq, pingaartumik isiginnaartussat illersuinissaat iluaqutigisinnaassagatsigu sunalu tamaat nuannersunngortillugu. VM-imut anngunniunnerit nunani allani ingerlanneqartartut peqataaffiginikuuagut, arnat assammik arsartartut nunanut allanut unammisartuini aqutsisuusoq Ivaana Holm oqarpoq.

Taanna oqaluttuarpoq nunatsinni unammisarfinni unamminissat nunatta unammiartartuinut akisussaaffimmik annertuumik tunisisoq, aammali sungiusarluarnissamut piumassuseqalersitsisoq.

- Nammineerlunga aamma aalajangiussaqarnikuuvunga soorlu nerisatigut, nukkassarnikkut qasujaallisarnikkullu suli pitsaanerulernissannik sungiusartarlunga nalunnginnakku taamanikkussamut unamminissamut pitsaasumik sunniuteqaqataasussaasut. Timikkut pitsaanerpaamik inissisimassuunga, Ivaana Holm oqarpoq.

Piareersaatit aallartipput

TAAK-imi siulittaasoq ilisimatitsivoq nunatta naatsorsuutigilluinnaraa NACHC-p allakkatigut akuersinera decemberip qiteqqunnerani pissallugu.

- Assammik-arsartartut kattuffianniit isumalluartorujussuuvugut qilanaarlutalu unammersuarnissamut qaaqqusisooqqinnissatsinnut. Taamaakkaluartoq sissuertumik isumatusaartumillu pissaagut iluatsilluarnissatsinnullu aqutsisunik sapinngisarput tamaat suleqateqarluarnissarput qulakkeerniarsarillugu, Carsten Olsen oqarpoq.

Taanna ilisimatitsivoq Nuummi anngunniutsitsinissat aappaagu juunip qiteqqunnerani ingerlanneqassasut naatsorsuutigalugu. Ullulli unammiffiusussat suli inissivinngillat.

Nunarput Pan-Am-imi unammersuarnerni 2018-imi kingullermik aaqqissuisuuvoq, TAAK-illu aaqqissuisuusimaneq misilittagaqarfigilluaraa Carsten Olsen isumaqarpoq.

Unammersuarnissamut tunngatillugu piareersaatit annertuallaassappata TAAK aaqqissuisutut tunuarsinnaavoq kingusinnerpaamik 1. februar. Siulittaasorli isumalluarpoq.

- Angusaqarusussuseq pigaarput neriuutigalugulu anngunniunnissamut aqutsisut nutaat siumut isigisumik piaartumik unammersuarnissamut pilersaarusiorneq aallartissagaat. Aqutsisut tassaassapput angusaqarsinnaassusillit, suliffeqarfiillu qilanaarutissaqassapput pisussamut peqataatitaanissaminnut, Carsten Olsen oqarpoq.