Nunarput VM-imut anngunniunnermi ajorsarpoq
Assammik arsarnermi nunanut allanut unammisartut USA-meersunut unammilluaqisunut ajoraluartumik ajorsarput.
Assammik arsarnermi nunanut allanut unammisartut Mexicomi nunarsuarmi pissartanngorniuttoqarnissaanut anngunniunnermi, Nunarput anngutsinngitsoorpoq. Ajugaaniutivinnermi Nunarput USA-mut 33-26-mik ajorsarmat anngutinngitsooput.
Nunanut allanut unammisartut aamma USA-mut unammeqqaarnerminni ajorsarput, sisamanngormallu ajoraluartumik pitsaanerusumik angusaqartoqanngilaq.
Unikkallarnermi Nunarpu målimik ataasiinnarmik, tassa 16-15-imik kinguaqqasimavoq, unamminerulli immikkoortuata aappaani Nunarput Amerikamiunut unammilluarluni Amerikamiut målinik pingasunik siuaqqanerat annerulersinnaveersaarpaa.
Unamminerup naammassineqarnissaanut minutsit arfineq-marluinnanngortut USA målinik arfinilinnik siuarpoq, tassaanngaannillu ajugaanissani qulakkeerlugu.
- Naggataatigut nukissaarukkatta, nunanut allanut unammisartunut sungiusaasoq Johan Zanotti unamminerup naasimatsiarnerani Sermitsiaq.AG-mut oqarpoq.
Amerikamiut målmandiat unammilluaqisoq
Unammineq timikkut assoroornarsimavoq, USA sakkortuumik illersuinini pissutigalugu minutsini marlunnik arlaleriarluni anisitaasoqartarluni. Målmandiallu Pal Merkovszki unammilluaqaaq, kalaallillu iserteriangaat arlallit annaattarlugit.
- USA-mit ilisimaneqarpoq, sakkortuumik unammigunik ajornartorsiortittussaalluta. Målmandiat unammilluaqaluni iserteriakkanik annaassisarpoq, nunanut allanut unammisartut sungiusaasuat oqarpoq.
USA ajugaaniutivinnermi ajugaangami nunarsuarmi pissartanngorniuttoqarnissaanut, aappaagu Sverigemi Polenimilu ingerlanneqartussamut annguppoq.
Nunarput sisamanngornermi unnukkut Mexico-mut ajugaangami tamatumalu siornatigut Cubamut naligiiginnarami ajugaaniutivinnissamut anngussimavoq.