Nunarput tusaaneqarnissaminut periarfissagissaarnerulissaaq

Kunngeqarfiup nunanut allanut sillimaniarnermullu politikkianut Issittoq pingaaruteqarnerujussuanngorpoq. Tamanna nunanut allanut sillimaniarnermullu politikkimut iliuusissani, danskit naalakkersuisuisa ippassaq saqqummiussaani atuarneqarsinnaavoq.

Kalaallit Nunaata aamma Savalimmiut tusaaneqarnissamut periarfissagissaarnerulerneranik tamatuma saniatigut kinguneqassaaq. Ph.d. Jon Rahbek-Clemmensen, Syddansk Universitetimeersoq naliliivoq.

Issittumi politikki pillugu ukiumoortumik ataatsimiinneq
Ukiumoortumik Issittumi Oqaloqatigiinneq aallartinneqarnissaa taakkartugaasa ilagaat, tassani kunngeqarfiup Issittumi suliniutai oqaluuserineqartassapput.

- Ukiumoortumik oqaloqatigiinneq eqqortumik alloriarnerulluinnarpoq. Kalaallit Nunaata aamma Savalimmiut eqqasuutitik aamma paasinninnerminnik oqaasertalersornissaannut taasisinnaanertik atorsinnaalernerinik kinguneqassaaq, Jon Rahbek-Clemmensen Sermitsiaq.AG-mut oqarpoq.

Jon Rahbek-Clemmensenip ukiup aallartereernerani suleqatinilu Anders Henriksen, nalunaarusiaq 'Grønlandskortet' saqqummersippaat.

Tusaaneqanngitsutut misigisut
Nunanut allanut sillimaniarnermullu politikkimi suleqatigiinneq pitsaanerusinnaagaluartoq, kalaallit politikeriisa aamma atorfilittat apersorsimasaannit oqaatigineqarpoq.

- Nammineq nunagisamut tunngasunik tusaaneqanngitsutut aperineqanngitsutullu misigisimasoqartoq, misissuinitsinni Kalaallit Nunaannit erseqqissumik akissuteqarfigineqarpugut, ilisimatooq oqarpoq.

Danmarkip Kalaallit Nunaatalu akornanni oqimaaqatigiinnginneq
Nunanut allanut naalakkersuisuusimasup Vittus Qujaukitsup (S) siullermik danskit oqartussaasui Politikenimi allaaserisami sakkortuumik isornartorsiormagit, kingornalu FN-mut maalaaruteqarami, naammagittaalliorneq sakkortuumik erserpoq.

Naalakkersuisut siulittaasuat, Kim Kielsen (S), Vittus Qujaukitsup iliuuserisaanut taakkununnga isumaqataanngilaq, kisianni tamatuma saniatigut Kalaallit Nunaat naammattumik tusaaniarneqarneq ajorneranik isornartorsiorneq isumaqatiginerarnikuuaa.

Manna tikillugu tunngaviusumik oqimaaqatigiinngittoqarpoq. Danmarkip nunanut allanut sillimaniarnermullu politikki oqaasertalersortarpaa, imaluunniit Danmark, Kalaallit Nunaat aamma Savalimmiut ataatsimoorlutik, Jon Rahbek-Clemmensen naliliivoq.

Taamatut isumaqatigiinnginnerit annertusinnginnerini ukiumoortumik ataatsimiittarnerit taakku pitsaasumik qaqinneqartarsinnaasut taanna isumaqarpoq.

Kalaallit Nunaata sillimaniarnermut politikki oqaasertalersussavaa
Kisianni aamma kalaallit tungaannut piumasaqaatitaqarpoq, taanna oqarpoq.

- Ukiumoortumik ataatsimiinnerit Kalaallit Nunaannut peqqinnartuusinnaapput, tassami Naalakkersuisut nunanut allanut sillimaniarnermullu politikkip tungaatigut qanoq perusunnerluni oqaasertalersuinissamut pisussaaffiliinerummata.

Naalagaaffik pingasunut agguagaq
Nalunaarusiami 'Grønlandskortet'-imi Jon Rahbek-Clemmensenip suleqataatalu, kunngeqarfik Kalaallit Nunaata Issittumi pingaarutilimmik inissisimaneranit naammattumik pissarsiaqanngitsoq uparuarpaat. Naammaginartumik ammasumik illuatungeriit sunik soqutigisaqarnersut oqaloqatigiissutigineqarneq ajornerat, pissutaasut ilagaat.

Ukiumoortumik ataatsimiittarnissat tamanna iluarsiivigisinnaavaat.

- Naalagaaffik pingasunut agguarneqarnera, immikkut ittunik paasinnittariaaseqarlutillu soqutigisaqartuusinnaasut erseqqinnerulersissavaa.

- Tamatigut isumaqatigiinneq ajortugut, kisianni naalagaaffeqatigiinnermut kikkut tamarmik pissarsiaqarfigisaannut ilaanermik akuersaartitsilersinnaavoq. Taamatut eqqarsarneq Nuummi aamma Københavnimi ilaatigut amigaatigaara.

Assortuunnerit ingerlaannassapput
Kisianni ataatsimiinnerit qanoq pitsaatigisumik ingerlagaluarpataluunniit, suleqatigiinnerlu allatigut nukittorsarneqaraluartoq, Danmarkip Kalaallit Nunaatalu akornanni ataqatigiinneq toqqissisimasumik aamma pitsaasumik ingerlanissaa ilimaginngilaa.

- Naalagaaffeqatigiinnermi assortuunnertaqanngitsumik ingerlalernavianngilagut. Isumaqatigiinngissuteqartoqartuaannassaaq, aamma kikkut aalajangiisuussanerinik isumaqatigiinngissuteqartoqartuaannassaaq, taanna naliliivoq.

Aamma atuakkit:

Ane Hansen: Iliuuseqartariaqalerpugut

Aaja: Issittumut periusissiap nutaap inuiaqatigiit iluaqutsissavai