Nunarput Tuluillu Nunaat aalisarneq pillugu nutaamik isumaqatigiissuteqartut
Aalisarneq pillugu suleqatigiinnissaq pillugu nutaamik isumaqatigiissuteqarnikkut ilaatigut qulakkeerneqarpoq Kalaallit Nunaata Tuluillu Nunaata (UK) ukiumoortumik ataatsimeeqatigiittarnissaat, ilaatigut aalisakkat pillugit aqutsinermut, nakkutilliinermut aamma nunani taakkunani marlunni aalisarnermik suliaqartut suleqatigiinnissaannut tunngassuteqartut oqaluuserisarniarlugit.
Kalaallit Nunaat Tuluillu Nunaat ataasinngormat isumaqatigiissuteqarput, tassani nunat takku marluk aalisarnerup iluani suleqatigiinnerisa ineriartortinneqarnissaat anguniarlugu.
Naalakkersuisut tusagassiorfinnut nalunaaruteqarnermi taamatut ilisimatitsipput.
Nunat taakku marluullutik ilaatigut isumaqatigiissutigaat aalisarneq pillugu ukiumoortumik oqaloqatigiittarnissaq, tassa nunat taakku marluullutik ataatsimeeqatigiinnermi aalisakkat pillugit aqutsinermut, nakkutilliinermut, ilisimatusarnermut, isumassarsianut nutaanut aamma aalisarnermik suliaqartut suleqatigiinnissaannut tunngassuteqartunik oqaluuserisaqartassapput.
Naalakkersuisoq: Suleqatigiilluarnissamut alloriarneruvoq
Isumaqatigiissut 2021-mi januaarip aallaqqaataani Tuluit Nunaat EU-mit anippat atuutilissaaq, isumaqatigiissullu Aalisarnermut, Piniarnermut Nunalerinermullu Naalakkersuisumit Jens Immanuelsenimit (S) atsiorneqarpoq:
- ulluussimaarutigaara Kalaallit Nunaat Tuluit Nunaannik Paaseqatigiinnissamik isumaqatigiissuteqarluni ullumi atsiorsinnaammat aalisarnerlu pillugu ingerlatsinerup ineriartortinneqarnissaanut suleqataanissamut qilanaarpunga, aamma ilisimatusarnermut. Neriuutigivaralu aamma aalisarnermik inuussutissarsiornerup ineriartortinneqarnissaa, isumaqatigiissutip tamanna periarfissimmagu.
- Kalaallit Nunaata Tuluit Nunaannik ullumi atsioqateqarnera pitsaalluinnartumik suleqatigiilluarnissamut alloriarneruvoq, Jens Immanuelsen isumaqatigiissummik atsiornermut atatillugu oqarpoq.
Atlantikup avannaani eqqaamiorisanik suleqateqarniartoq
Tuluit Nunaannit nunap avatangiisinut, aalisarnermut nunamilu pissutsinut naalakkersuisoq Victoria Prentis atsiortoq, isumaqatigiissuteqarneq pillugu imatut oqarpoq:
- Tuluit Nunaat aamma Kalaallit Nunaat nunaapput oqaluttuarisaanermut tamarmik tulluussimaaruteqartut, nunanut tamalaanut suleqateqarsinnaasut, nunat taakku imartaasa uumasuinik pisuussuteqarluartut. Kalaallit Nunaat qutsaveqarfigerusuppara isumaqatiginninniarnermi inerititaqarusussuseqarluni pissuseqarmat.
- Nammineerluta nunatut sinerialittut kingumut nammineeriartuaarnitsinni anguniarparput nunat Atlantikup Avannaani sanilerisavut suleqatigissallugit, soorlu Kalaallit Nunaat, aalisakkanik suliffissuaqarnitsinnut imammamilu avatangiisitsinnut iluaqutaasumik, Victoria Prentis oqarpoq.
Naalakkersuisut aamma sulissutigaat, Tuluit Nunaata EU-mit anineranut atatillugu, nunamik niuernikkut isumaqatigiissuteqarnissaq, ilaatigut Kalaallit Nunaannit Tuluit Nunaannut tunisaqartarneq qulakkeerniarlugu, tassa tamanna EU aqqutigalugu pisinnaajunnaarpat.
Aalisarneq pillugu suleqatigiinnissamik isumaqatigiissut tamaat Naalakkersuisut nittartagaatigut atuarsinnaavat.