Nunarput sinniisumik NATO-mut Bruxellesimut aallartitsivoq

51-inik ukiulik Lida Skifte Lennert, ukiuni arfineq-pingasuni Bruxellesimi Kalaallit Nunaata Sinniisoqarfiani pisortaanikuuvoq, ukiunilu tallimani Kalaallit Nunaata Danmarkimi Sinniisoqarfiani pisortaanikuulluni.

Maanna Kunngeqarfiup Danmarkip NATO-mut aalajangersimasumik sinniisuutitaqarfiani Naalakkersuisut aallartitarissavaat.

Naalakkersuisut kiisalu Nunanut Allanut Ministeriaqarfik kalaallimik atorfilittamik qaffasissumik Bruxellesimi Kunngeqarfiup Danmarkip NATO-mut aalajangersimasumik sinniisoqarfianut Lida Skifte Lennert aallartitarissallugu isumaqatigiissuteqarput.

Atorfilittaq taanna Nunanut Allanut Ministeriaqarfiup aallartitai allat peqatigalugit sinniisunut ilaassaaq taavalu Kunngeqarfiup isumannaallisaanikkut pingaartitaasa sulissutigineqarnerannut atatillugu Issittoq pillugu immikkut ilisimasaminik tunniussaqartassalluni, Naalakkersuisut ataasinngornermi tusagassiuutinut taama nalunaaruteqarput.

NATO-p paasinninnerata annertusinissaa pingaaruteqartoq

Ruslandip Ukrainemut sakkortuuliornera ilutigalugu NATO-p Issittumut ukkatarinninnera annertusiartorpoq.

- Pissutsit taama ilisimanerat ukiuni aggersuni Kalaallit Nunaanni Naalakkersuisunullu pingaaruteqarnerujartuinnassaaq. Taamaammat Avannaarsuani isumannaallisaanermut politikkimut, kiisalu NATO-p nunarsuup ilaanut tamaanga isiginninneranut Kalaallit Nunaata ilisimasaqarnerulernissaa pingaaruteqarpoq, Nunanut Allanut, Inuussutissarsiornermut Niuernermullu Naalakkersuisoq, Vivian Motzfeldt, taama oqarpoq.

- Aammattaaq nunani eqqaamioriinni uagutsinni pissutsit immikkut ittut inuiaqatigiiusugullu pilluta NATO paasisimasaqarnerulernissaa pingaaruteqarpoq, kiisalu soqutigisatsinnik, naleqartitatsinnik pingaarnerutitatsinnillu ilisimasaqarnissaa pingaaruteqarluni, naalakkersuisoq itisiliivoq.

Naalakkersuisut 2023-mut aningaasanut inatsisissatut siunnersuutaat ukiumut 2 millionit koruuninik nutaanik aningaasartuutitaqarpoq, taakku NATO-p Bruxellesimi qullersaqarfiani nunatta aallartitaanut aningaasaliissutaapput.

Ukiuni 25-ni misilittagalik

Lida Skifte Lennert Københavns Universitetimit inatsisilerituutut ilinniarsimavoq, aammattaaq inatsisilerituut Skotlandimi Universitetimi nunat tamalaat attaveqarnerinut tunngasumik Masteritut ilinniarsimavoq.

1998-mit Namminersornerullutik Oqartussani atorfinippoq, 2004-miillu nunanut allanut aallartitaqarfimmiilerpoq, tassani Kalaallit Nunaata Bruxellesimi aallartitaqarfiani allattaavoq. Ataatsimut isigalugu Naalakkersuisut ataanni qitiusumik allaffeqarfimmi sulinermik ukiut 25 missarpiaanni misilittagaqarpoq, tamatuma saniatigut Nunanut Allanut Ministeriaqarfiup Isumallisaanermut Politikkikkut Allaffiani sivisunngitsumik suliartortitaasimavoq Kunngeqarfiup NATO-mi soqutigisaminik sulissuteqarneranik ataqatigiissaarisuutitaasimalluni.

- Atorfik assorsuaq soqutiginarpoq assoroornartoqassallunilu. Isumannaallisaanikkut politikkimut tunngasutigut suleqataalernissara qilanaareqaara.

- Tamatumani nunatsinni avataanilu misilittakkakka atorluarsinnaassavakka. Annermilli Kunngeqarfiup Danmarkip NATO-mut aalajangersimasumik sinniisuutitaqarfiani kalaallit nipaat nutaartaassaaq, aammali kunngeqarfiup issittoq eqqarsaatigalugu NATO-mi pingaarnerutitaanik sulissuteqarneranut nukittorsaataassalluni, Lida Skifte Lennert, atorfik nutaaq pillugu taama oqarpoq.