Rubinisiorneq
Nunarput rubinisiornissamut piareersimava?
Inuiaqatigiinnut avatangiisinullu sunniutaasinnaasut pillugit tusarniaasoqalerpoq Qeqertarsuatsiaat eqqaanni rubinisiornissamik qinnuteqaammut atatillugu
Nuup kujataani Qeqertarsuatsiaat eqqaanni rubinisiornissamut isummersornissamut maanna periarfissaqalerpoq. Inuiaqatigiinnut avatangiisinullu sunniutaasinnaasut pillugit tusarniaaneq septemberip tungaanut ingerlasussanngorpoq.
Aatsitassarsiortitseqatigiiffik True North Gems rubininik qalluinissamut qinnuteqaammik namminersorlutik oqartussanut tunniussaqarpoq. Qinnuteqaatilli naalakkersuisuni isummerfigineqarnissaa sioqqullugu tusarniaaneq ingerlaqqaassaaq.
Aatsitassarsiortitseqatigiit inuiaqatigiinnut avatangiisinullu sunniutaasinnaasut nammineq misissuinerat pereerpoq. Taanna siunnersuisartut Rambøll Grønlandip aamma Gromtmij A/Sip suliaat namminersorlutik oqartussat nittartagaannut www.naalakkersuisut.gl-imut ikineqareerpoq.
Tusarniaalluni ataatsimiinnerit arlallit pissapput soorlu London Mining Isukasiani aatsitassarsiorniarluni qinnuteqarmat taama pisoqartoq. Ataatsimiinnerit arlaannaannut attuumassuteqanngitsunit aqunneqassapput suliassarlu suliarinnittussarsiuunneqassaaq.
- Nuummi aamma Qeqertarsuatsiaani tamanut ammasumik ataatsimiisitsinissanut aamma soqutigisaqatigiit tusarnissaanut erinisuppunga, neriuutigaaralu ataatsimiisitsinerit peqataaffigineqarluarumaartut, Inuussutissarsiutinut Aatsitassanullu Naalakkersuisoq Jens-Erik Kirkegaard oqarpoq.
Tusarniaaneq septemberip aallartilaarnerata tungaanut ingerlassaaq.