Nunarput målinik 13-nik Pan Amimi ajugaasoq
Kalaallit angutit assammik arsartartut nunanut allanut unammisartui Amerikap nunavittaani pissartanngorniunnermi aappassaa unammipput, taakku Paraguayimut ajugaapput. Assit takukkit
Unammineq naammassisoq Inussivimmi siggartoqarmat målit allattorsimaffianni 35-22-mik allaqqasoqarpoq, tassani kalaallit nunanut allanut unammisartui Amerika Kujallermeersunut Paraguayimiunut ajugaapput.
Taamaalillunilu kalaallit Amerikap nunavittaani pissartanngorniuttoqarnerani marloriarlutik unammigami sisamanik pointinnapput. Iligiit muminnermi 17-13-mik siuaqqareerput.
Ajugaanissaat unamminermi ulorianartorsiortinneqanngivippoq, taamaakkaluartoq unamminermi unammilligassaqartoq, sungiusaasoq, Ingi Olsen, Sermitsiaq.AG-mut taama oqarpoq.
(Nunanut allanut unammisartunut sungiusaasoq Ingi Olsen assimi takuneqarsinnaavoq)
- Illersuinermi inissisimaffik nutaaq misilipparput, tassani 5-1-imik assersuiniarsarivugut. Tassani unamminermi taamaaliornissarput pilersaarutaavoq, kisianni tamakkiisumik iluatsinngilaq. Unamminerup immikkoortuani siullermi peqqissaanngilagut kukkuluttoqattaarlutalu, Ingi Olsen oqaluttuarpoq.
Unammineq naatsorsuutigisamit artornarnerusoq, Ingi Olsen oqarpoq.
- Unamminernik oqitsoqarunnaapajaarnikuuvoq. Iligiit peqataasut tamarmik uummateqarluarlutik unammipput. Unamminerup immikkoortuata aappaani illersueriaatsitsinnut 6-0-imut uteqqippugut. Tamatuma kingorna inissisimalluarluta unamminerup immikkoortuata aappaani arsarluarpugut. 6-0-imik illersuinermi nukittunerusugut uppernarsivara, taanna oqarpoq.
Uruguayimut unammineq aalajangiisussaq
Ataasinngornermi Uruguay unammineqassaaq, taakku aamma Pan Amimi marloriarlutik unamminerminni ajugaapput. Unamminerlu aamma aalajangiisussatut inissinneqarpoq, tassani unamminermi ajugaasut semifinalimut anngunnissamut periarfissagissaalissagamik.
- Ullumikkut unammisartorpassuit sipaaqqippakka, unammisartullu piareersimanissaat qularinngilara. Suut iluatsinnersut iluatsinnginnerunersullu paasivagut. Uruguayimut unamminissamut isumalluartorujussuuvunga.
- Piginnaasagut upperisorujussuuagut, ataatsimoornerpullu nukittoqutigivarput, arsartut qiimapput.
Kalaaleq unammisartoq ajoqusertoq
Isuani arsartartoq Aqqalu Ingemann Pan Amimi unamminera taamaatippasittoq, taanna ilisimatitsivoq.
- Qutuni napisimagunaraa, timimik sungiusaasorput oqarpoq. Tamannalu taamaassappat paarlaaniarpunga, tassani Miilu Rosing isissaaq, Ingi Olsen oqarpoq.
Pan Amimi sapaammi unamminerit:
Gruppe A:
- Puerto Rico - Argentina: 18-42
- Guatemala - Chile: 14-39
Gruppe B:
- Canada - Uruguay: 24-26
- Colombia - Brasilien: 22-42
- Kalaallit Nunaat - Paraguay: 35-22
Ataasinngornermi unammisussat:
Gruppe A:
- Kl. 14.00: Puerto Rico - Guatemala
- Kl. 18.00: Chile - Peru
Gruppe B:
- Kl. 12.00: Canada - Colombia
- Kl. 16.00: Brasilien - Paraguay
- Kl. 20.00: Kalaallit Nunaat - Uruguay